يا موت (مكتوبة) - باسم الكربلائي

 

 

يا موت .. جم صوت 
تهتز السمه ابنغمة شجونه
ويلاه .. جم آه
هذا العيد اجه و اتاخذ ابونه
فقط خلي الصميدة
و اخذ كلشي التريده

يا موت اهواي تستعجل 
على البي غيرة و امروة 
علامَك
تعوف الفاگد الرحمه
تجي لليسمع الشكوه
علامَك
تريد اتذلنه بفراگه 
ابونه و شوفته الحلوة
علامَك
تركت اشجم نذل عايش
اخذت الغالي و السلوه
علامَك
شتريد .. و العيد 
مقبل و احنه نتلاگاه يتامه
اعنيك .. و ادريك
رايدنه نظل ابلا كرامة 
درجع لمسة ايده 
واخذ كلشي التريده

يدره امن السمه نزلت
و لكن ما حفظناها 
وسافه
محنة والدي و اكثر
علي ابعينه لگناها
وسافه
يخيمة عافية اعلينه
تطيح اليوم شفناها
وسافه
سمعنه الهاك و اتدلل
و البس ما سمعناها وسافه
كل يوم .. مهموم
يتعنه علينه ابأبتسامه
و الصار .. ما صار
غيابه هذا لو يوم القيامة 
ولو ساعة تعيده
و اخذ كلشي التريده

يصوت يا هله و مرحب
يقبل الباب ما يندگ
صفاته
يجوّع اهله و يشبعنه
سترنه ابثوبه المزگ
صفاته
شمس من الشرق يطلع
نشوفه امن الغرب اشرگ
صفاته
يدور اعلينه لو ضعنه
مثل فارس يدور الحگ
صفاته
مطبور .. معذور
بس عدنه طلب يا بو الحميه
نرجاك .. ننخاك 
افزع لو شفت زينب سبية 
و لا تبقه وحيده 
اخذ كلشي التريده

علي القران واسراره  
وجوبا اسمه يترتل  
قراره 
عجيبه للسمه صاعد 
و هو الليلة يتنزل  
قراراه
صعد بس خله ابو فاضل   
شبل وبزينب تكفل  
قراره 
تعاهد قبل ابو الاكبر   
على الشط يوگع الأول  
قراره 
وصاه .. وانطاه  
رايه وگله يا حامل لوانه 
عباس ..عباس  
زينب غاليه وعندك امانه
وحگ امها الشهيدة 
و اخذ كلشي التريده 

بده فجرك فجر اسود
مثل گلب اليبغضونك
يبويه
ضوّه مطفي و سمه احمر
مثل دمع اليحبونك
يبويه
يبو وجه الحلو لونه
نشوفك منخطف لونك
يبويه
يبو اتراب التراب ابنك
بجه و ايگلك اشلونك
يبويه
احزان .. و اعلان 
افرحوا يالشماته ابهالمصيبة
مجروح .. مذبوح
شنهو عيشته الميّت حبيبه
درجعه مو بعيده 
واخذ كلشي التريده 

صدگ لو مو صدگ صارت
ابو الحمله يشعونه  
عجيبه 
علي أكبر جبل طايح 
إذاً منهو اليشيلونه   
عجيبه 
صدگ ساكت ولا يحجي 
بني الزهره يحاجونه  
عجيبه 
صدگ زينب تصيح اگعد  
و اهو ما يفتح عيونه 
عجيبة
شنگول .. معقول
زينب تلطم وما يگعد الها 
واتگوم .. وتحوم 
ولا فك عينه الها وباوعلها
لوّنك تستعيده
واخذ كلشي التريده

غيابك كسرة الخاطر
يكسره و منهو يجبرها
اليمه
يريت اگبورنه قبلك 
يبو الحسينين نحفرها
أليمه
يروس اللي ارفعتها انته
وجوب الليلة نطبرها 
اليمة
علي و صدورنه حتماً
عليك ابحرگة نكسرها
أليمة
تعبير.. تطبير   
فدوه لهامتك ما تبقى هامه 
بفنون .. وجنون   
نلطم والصدر نكسر عظامه
المحب هذا نشيده
واخذ كلشي التريده

غفيت ابحضن ابو اليمه
 ابو اليمه عرف قصدك 
مصيبة 
تگله يولدي بالطف
باجر منهو اليوسدك
مصيبه
يبويه وسهم المثلث
 يطرني من يطر جبدك
مصيبة 
تطيح امن المهر تلگه 
ابوك و فاطمة و جدك
مصيبه
معروف .. و انشوف 
من سيف الشمر يگطع وريدك
و انطيح .. و انصيح
لا يبن اللعين انشلت ايدك 
فداءً للعقيدة
واخذ كلشي التريده

للشاعر : السيد عبد الخالق المحنه