ملك الموت (مكتوبة) - باسم الكربلائي

ملك الموت إجـه وبي حيره چانت
سأل هـاي المّـره شچم مـره ماتت
اتذكرتـها من الجروح .....بكل جرح تنطيني روح

شچم مره ماتت .

ماتت من سواد الليل...ما مرت عليّ گمره
مو هينه عليها اتشوف...فرگة فاطمه الزهره
والعنده أمر يخفيه...نتوقع يضم سره
بس اليخفي دمعه اشلون...لابد يتضح أمره

حگہا من تشوف امها وضلعها
تتشاهد لمن ينزل دمعها

موتها چان الطموح ....بكل جرح تنطيني روح

شچم مره ماتت

ماتت من ضوه المحراب...صار من الجرح مُظلم
زينب شاگفتها ادموع...ضربةّ سيف ابن مُلجم
من تنطي اليتيمه ألوان...ويظل عالورق يرسم
يرسملك گبر و ورود...يمه وعطر فرگه اتشم

كل نسمه هوه تحولها حسره
إذا من الجبل تتهاوه صخره

ينكسر گلب السفوح ....بكل جرح تنطيني روح

شچم مره ماتت

ماتت من تجره الخان....واغتال الكرم كله
من صدت على الديوان...شافت وحشة الدله
راح المن يدگ الباب....عالجايع يسد خله
وراح الچـانت الحوراء...تحط عن الشمس ظله

چانت لو تأخر عنها طيفه
تگلهم هِسه ودوني المضيفه

ريحة الگهہوه التـفوح ....بكل جرح تنطيني روح

شچم مره ماتت

كل موعد منيه إيروح...تلگه الموعد التالي
ماتت من مشت لـحسين...وتراب الحـرب عالي
من گالتله راسك وين...من شافت نحر خالي
ماتت من درت بالسيف...گطعو خُنصر الغالي

بس اتخيــل الموقف مصيبه
واحد ينّگطع خُنصر حبييه

حتى ظلها ابصمته نوح ....بكل جرح تنطيني روح

شچم مره ماتت

ماتت من لگت چفين...كل چف تلزم بضفه
وگفت دورت عباس...صاحت وين ابو الكلفه
وين المن يجر السيف....من حـره الشمس تدفه
وين المن يمر بالجيش...تضوي الرايه الـبچفه

صاحت يانهر بعيوني حيره
ياسيـف الوصل بدر العشيره

رايته اعله الشط تلوح ....بكل جرح تنطيني روح

شچم مره ماتت

ماتت من مشت للشام...ووجوه الحرس غُربه
إذا يبچي طفل بدموع...واحد منهم ايضربه
غريبـه وصعبه عالمجروح...مايبقـه أخو ابقربه
مو سهله على المهموم...تبقه السالفه ابگلبه

زينب مو سهل تنگاد أسيره
هاي أخت الرؤوس الكلها غيره

منّظر الطف مايروح ....بكل جرح تنطيني روح

شچم مره ماتت

ماتت من رقيه ابليل...شهگت عالطشت حرگه
من شمت هوه من حسين...والله ياهوه الملگه
من شافت نظرتـه أبذاك...جفنـه اليرفض إيطبـگه
من همست ييويه أتشوف...هاي امتـونه الزرگه

زينب جربت طعم المنيه
لمن علرأس نامت رقيه

شافت الموت ابوضوح ....بكل جرح تنطيني روح

شچم مره ماتت

 

للشاعر : إيهاب المالكي