ياروحي شقد صعبه (مكتوبة) - باسم الكربلائي

ياروحي اشگد صعبه....ضاع العمر ابغربه...وباچر غربه انموت

ريت الموت إيتاني....شوگ ايجيب أخواني...يشيلون التابوت

لومماتي
بين إخوتي
مايهمني
حتى موتي

ناري نار فراگ
شايفها المشتاگ
لا ياموت الغربه العشنه وياهم وين
زينب واترجاك
واني عِشرة وياك
لو ماتاخذ روحي لحد ماشوف حسين
هواي بعيد الشام
رايد ممشه أيام
خوفي الدرب ايأخره المشتاقتله العين
روحي وگلبي وياه
لموتي ما انساه
شوف فراگه شسوه وبيه اشسوه البين

ماريد اطبك رمشي
لايمشون ابنعشي
وماكو وياي عزاز
ثاري البين اخوتها
ما تصعب موتتها
لوأخوها الجناز

أُمنياتي
كل رجوتي
لومماتي
بين إخوتي

ليلي ليل غياب
عيني تبچي عتاب
اشما تنزل دمعاتي يوگع دم وماي
ليش ايامي أتطيح
ريشة ابحظن الريح
راسي وگلبي مشيب من ايام اصباي
موتي استعجل ليش
صار ويايه ايعيش
ليش وانه بزغري وعايش موتي وياي
نام بـروحي احساسي
بي ريحة عباسي
جاي ابلايه اچفوفه وجايب لإختـه الماي

جاي ايوادع روحي
صوته ينوم جروحي
اليلچمني ابفرگاه
ماي يگطر لإخته
ذاكه المن فارگته
راحت روحي وياه

بي كلامي
بي سكوتي
لومماتي
بين إخوتي

صوت انفاسي ايگول
ريت الليل ايطول
باچر سفرة موتي وماجوني الغياب
لا ياموت اشبيك
كافي اتوسل بيك
رايد تاخذ روحي بلايه وداع احباب
بداعة عمري الفات
لو تصبر ساعات
ساعه وچف احبابي راح ايدگ الباب
لوهسه أمـي هنا
صاحت وا ويلا
جيتچ يمه ابضلعي المكسور وماطاب

ياموتي وشيلتها
لو أشتـم ريحتها
اتسويلك معروف
ساعه اتنشف دموعي
ساعه اتصيح ضلوعي
وساعه بجرحي تروف

وساعه تسمـع
كل شكـوتي
لومماتي
بين إخوتي

وانه بهذا الحال
راح ابعث مرسال
خاتمته من جروحي وكاتبته بدمعات
فوگ جناح الطير
يوصل لأهـل الخير
صوب النجف وحيدر يتعذر هيهات
شلون تعوفه هناك
روحه وگلبه وياك
يا غربه ايدفنونه وهو بشوگك مات
بويه ابنيتك هاي
ريتك هسه وياي
ساعةْ موت وصعبة ياگاضي الصعبات

لويوصل مرسالي
بويه وتعرف حالي
توصل گبل الصوت
لو غربه ايشيعوني
بدونك ويدفنوني
بويه أدريك اتمـوت

بويـه حيـدر
هذا صوتي
لومماتي
بين إخوتي

بين فراگ وبين
شوگ وغربه سنين
خوفي تطلع روحي واهلي مايدرون
روحي الما ترتاح
طيره ابلايه جناح
لا تگدر توصلهم لا من همه ايجون
لوجوني من ابعيد
نار جروحي تهيد
جان اشتم ريحتهم حتى الموت إيهون
راحوا نسمة صيف
مامرولي ابطيف
وراحت وي روحتـهم مني اثنين اعيون

يانوم الما شفته
ياسهر العاشرته
وياجرحي الماطاب
يـاريت ابصفناتي
وي طيحة دمعاني
اسمع دگة باب

بكل دعائي
بكل قنوتي
لومماتي
بين إخوتي

ريت آني وياريت
وهوايـه اتمنيت
موتي ابين احبابي وما بين اغلـه الناس
صار أكثر من عام
عيني أتـشوف احلام
رايح لون الوردة وذابل عود الياس
خوفي من النسيان
وموتي ابلا دفان
لكن ماينـسوني ابموتي وعندي إحسـاس
شاغلني التفكير
گبري اتمنه ايصير
بيـن حسـين الغالي ومابيـن العبـاس

ليليه ايزوروني
وبهمي ايواسوني
وينسوني الصار
وانه اذكر آلامي
ناري وحرگ خيامي
ويطفولي النار

ياكفيلي
وياقدوتي
لومماتي
بين إخوتي

هاي آخر لحظات
بيها شگد حسرات
صار الطف بـعيني وكرهني بدنياي
صاحت روحي بصوت
مااخاف من الموت
وانه زغيره ابعمري وشفت الموت هواي
روحي بطف حسين
ماتت بــي مرتين
وحده بگطعة نحـره وحده بشـاطي الماي
ثالث موتـه بـروحي
هاي البيـها جروحي
انه امشي ومسبيـه وروس أخواني وياي

ياموتي الماخذني
نار الشام اتذبني
وتدري بـدرب الشام
هاك أحسب دمعاتي
ناري بـگد خطواتي
عمري الليـله أيام

جمره جمره
بـي خطـوتي
لومماتي
بين إخوتي

 

للشاعر : أحمـد الذهبـي