راح أنحب (مكتوبة) - باسم الكربلائي

راح انحب على اولادي كل صبح ومسيه
بين المدينة وبين ارض الغاضريه

إسمع علي بن فايز اشگال ابونينه
نوحي على اولاد يازهره الحزينه
مادره گلبي اعله الحسن يبچي وحسينه

ذوله العزاز واغلـه من روحي عليه

انحب مثل بنت الغصن لو فاض دمعي
حته كسرتي اعله الولد نستني ضلعي
كل يوم ادور ناعيه اعله احبابي تنعي

اهدم ابحيلي وأبني مأتم للرزيه

انه اعله محنة كربله بس الله حسبي
من حسين گطعو منحره گطعولي گلبي
غورگت عيني امن الدمع ماشوف دربي

اتوچه گمت اعله العصه ولا حيل بيه

وحسين ظل بالشمس مطروحه جثته
مسلوب ثوبه وبس رمل مفروش تحته
انلجم مدري امن الشمس مدري مـن إخته

من نادته يحسين إذا حي رد عليه

مكسورة خاطر ماشفت بس نايباتي
مو بس على اولادي نحت حـته البناتي
ليش انسبن فوگ الهزيله امـدللاتي

ام چلثوم وي زينب مشن بين آل أميه

تجرحني زينب لو اجه ابالي سبيها
ايضربوها بالسوط وتشاگفهم بــإديها
طول السبي اتصبـر عالاطفال ابحچيها

سكنه وحميده وفاطمه وخوله ورقيه

حالي الحزين الما يسر حته الأعادي
مانمت ليلة وچم سهم گطع افادي
مدري انادي حسـن لو يـحسين انادي

مدري يـزينب اصرخ بدمعة جريه

 

للشاعر : كرار حيدر الخفاجي