فوق السطح (مكتوبة) - باسم الكربلائي

بينما كنت اراك سيدي محمد الجواد على سطح الدار في بغداد
وفي اخر اللحظات وانت عطشان تستقبل الموت بالسلام عليك يا ابا عبد الله الحسين ع اخذني هذا المنظر الى منظر ثقتكم وابن عمكم مسلم الحسين ع
وهو على سطح القصر في الكوفه وهو عطشان يستقبل الموت ويقول
السلام عليك يا ابا عبد الله الحسين

فوگ السطح غابت شمس
تشبه وضع مسلم امس
بغداد كوفان العصر
وجهين والعمله الغدر [ فوق السطح ]

حزن يورث حزن والمدمع ايواكب
شعدهه الغربه وي احفاد ابو طالب
على سطح القصر مسلم بقه ايعاتب
وشباب اليمه شفته اعله السطح شايب
نفس الالم نفس الحچي
نفس القهر. نفس البچي
نار الفتن نار الجمر
وجهين والعمله غدر

ثقة معصوم مسلم نعرف بقدره
وعله ذاك السطح ما حصّل الكطره
وشفت حال الجواد امن انختم عمره
مثل فطر الجدار اشفافه متفطره
ما يختلف غير الزمن
ثوب العطش لبسو چفن
حر الظمه وحر الظهر
وجهين والعمله غدر

الوكت من صار ندري هذا قانونه
اذا تلكه الوفي تلكه اليغدرونه
مسلم حتى محد يعرف شلونه
الزلم من عينه طاحت طوعه بعيونه
وابن الرضا محد اله
والبي غدر من منزله
وام الفضل واهل القصر
وجهين والعمله غدر

شفت مسلم ابد ما حاير بدمه
يسلّم عالحسين ورد ابن عمه
الجواد بكربله وبس عالسطح جسمه
قبل ما روحه تصعد زار ابو اليمه
طاف النهر. شاف الكمر
طاف الخيم شاف النحر
هذا العصر ذاك العصر
وجهين والعمله غدر

الجنازه تريد صايح سكته ما تطلع
وجنازة مسلم احبال وشتم تسمع
انقفل بيت الجواد بوحده يتلوع
انكطع خيط الفجر وادموعه ما تكطع
ماكو اخو ماكو ابن
اثلاثه بقه امتاني الدفن
والفرگه والموت اليمر
وجهين والعمله غدر

الفرق بالطف نشوف شيرسم المنظر
بنواويس الطفوف ايتام تتطشر
بنت مسلم حميده حايره بالبر
ولون بنت الجواد اهناك تتيسر
بعد اليتم ضرب المتن
وما زارته ضلّت تحن
سوط الشمر جرح اليسر
وجهين والعمله غدر

الشبه يرجع نشوفه والحجي انكمله
وكع قصر الاماره ومسلم اليعله
منو بحال الخليفه وياهو يندله
وصبح كبر الجواد اعله الارض قبله
مرقد يشع جنة عدن
قبّه ذهب واكبر صحن
واللي ظلم واليندثر
وجهين والعمله غدر

 

للشاعر : حمزة السماوي