أويلاه (مكتوبة) - باسم الكربلائي

أويلاه...هذا البدر من يا سمه
أويلاه...هذا القيود بمعصمه
كاسر اعظامه حبل قيد الأسر...منحني وصاير مخيم عالخدر
أويلاه...أويلاه
 
يا حلم رايد جواب...جبت صورة يا مصاب...وراودتني
آني ما شايف أسير...منحني بهيبة أمير...شوفتني
هذا معقوله العليل...يسند الناقه التميل...وحيرتني
إقطع الشك باليقين...هذا زين العابدين...جاوبتني
حرامات...ذاكه التشوفه ابن النبي
حرامات...ذاكه اليهضمونه ابسبي
باجر من الله اليجرحه اشيعتذر...منحني وصاير مخيم عالخدر
أويلاه...أويلاه

عاليتامه امخلي عين...وعين يم نحر الحسين...وهيه حيره
عالرمح شالوا ضواه...تنضرب زينب وراه...وهيه أميره
اسياط واحبال وسيوف...وعين ما ترحم تشوف...ما كو غِيره
والعبد صاير وزير...والملك ظل يستجير...ابلايه ديره
حُسيناه...دار الزمن بأهلك تره
حُسيناه...دار وحكم خصمك جره
دارت وحسرة بناتك تستمر...منحني وصاير مخيم عالخدر
أويلاه...أويلاه

إيد شدوها اعله إيد...رقبه لفوها ابحديد...وممشه هيمه
ينحني بسما يطيح...وريح يتوجه اعله ريح...دمعه غيمه
چنه يسأل يا سماء...للنوارس ما كو ماء...ماكو خيمه
وسكنه تسأل عالدلال...ويجرح احساسه السؤال...بيه هضيمه
يعباس...ماي اليتاماكم ردت
يعباس...ماي السكينه ما جبت
عطشت ولسه الرجعتك تنتظر...منحني وصاير مخيم عالخدر
أويلاه...أويلاه

كل جرح ينزف عتاب...يمم اجروحه التراب...ما توضه
الخطوه تسبيحه وصلاه...ويسجد وتسجد عصاه...أده فرضه
ايرتل آيات الوادع...امسافر وحزنه المتاع...ما يرفضه
فاقد إخوان وعمام...ذبحوا إقباله الإمام...من يعوضه
علواه...راعي الحمية لو صحت
علواه...راعي الكفالة يلتفت
بلكن ايشوفه و يگف سوطه الشمر...منحني وصاير مخيم عالخدر
أويلاه...أويلاه

ايصيح يا زينب سلام...لونج ارماد الخيام...اشما لمحته
صوتج الدافي الحنين...اتغير وأسمع ونين...اشما سمعته
وآنا خجلان من أجيچ...الحبل ياكل بديچ...و ما گطعته
والشمر رمحه اعتناچ...وآنا أباوع له من إجاچ...ما دفعته
سلامات...ها يالبقيتي من هلي
سلامات...ها يالتناديني علي
عاشت اوياج الجروح امن الزغر...منحني وصاير مخيم عالخدر
أويلاه...أويلاه

يمشي ويسولف أمان...وعالضعن يمطر حنان...يقره آيه
ايخاف لا يوقع يتيم...وطفله تشتاق وتهيم...ابلا درايه
صحره واعيون الذئاب...جسره ما ترحم حجاب...ابلا حمايه
يدري ضعنه ابلا كفيل...ما كو للكافل بديل...وما كو رايه
عله الآه...يحله بعذابات الشمع
عله الآه...يحله بنياشينه الدمع
تخلص الظلمه ويشع نور الفجر...منحني وصاير مخيم عالخدر
أويلاه...أويلاه

بالقصر ما عنده سيف...جان من يحجي اعله كيف...بس گتلهم
اهنا وقف واهنا يزيد...اهنا ملك واهنا عبيد...ترجم إلهم
آنا بن نهر الحياة...عمي ذل ماي الفرات...باوع إلهم
نظره بس چانت تگول...وتشرح أنساب الأصول...وعارص إلهم
وعدناه...عرش الضلاله ينهدم
وعدناه...عرش الخيانه ينهزم
ينتهي الطاغي وعلمنه ينتصر...منحني وصاير مخيم عالخدر
أويلاه...أويلاه

 

للشاعر: أحمد الذهبي