ما أريدك (مكتوبة) - باسم الكربلائي

ما اريدك تعتذر .. يالماكو مثلك
ياكفيلي و آنه اوله .. اعتذر لك

يااعذب من الماي

ماقصرت وياي

انه اول شمس طلعت بالمسيه
گبل لا عوفك على الشاطي رميه
خويه ماجيت اطلب ابحگ الوصيه
جيت اگلك شكرا واطلع سبيه

لا يهمك للسبي لوراحت اختك
خويه إبقه اعله النهر مبريه ذمتك

رغم المشي وية اعداي

ما قصرت وياي

جيت بس اعتابي بالخيمه تركته
اعليمن اعتب خويه هوه امقصر إنته
ياهو مثلك ضحه بإيساره ويمنته
والسهم بعيونه لجل اعيون اخته

ما أعاتب وآنه ادري أبتضحياتك
كفو منك يالذي أمدلل خواتك

أشهد يخويه ابهاي

ما قصرت وياي
​

إنته سامحني إذا وحدي اعتنيتك
ماخذت أذنك لمن للشاطي جيتك
أطلع من الخيمه ماتقبل حميتك
لچن مجبورة الزلم داسوا ثنيتك

خويه عذراً لونحت مثل الثواكل
مو ابــإيديه أنـشاف طولي يابوفاضل

يامن چنتلي فياي

ما قصرت وياي
​

ثلاثه وثمانين طفله وحرمه وياي
وحده وحده اتگول سامحنه يوفاي
والرباب اعله الأخص تتعذر اهواي
ابسبب طفلي طاحن اچفوفه على الماي

اعتذرلك چي شربت الماي عگبك
إنته ظامي بعدك وممرود گلبك

هم ظامي هم رواي

ما قصرت وياي
​

اعتذرلك خويه لو اكسر سكوتي
ابخطبة الكوفة تره ايسمعون صوتي
اهناكه ياعباس راح اتمنه موتي
اشما احشم ما يفزعولي أخوتي

من احشمك ادري آذيك أبونيني
آنه عاذرتك ولو ماتعتنيني

لو ماتجي عناي

ما قصرت وياي
​

إعليه لو طر الصبح راح امشي عنك
وإلي فرهد خدري باچر يحدي ظعنك
ما اظن تدري اشكثر خجلانه منك
تبقه مرمي اعله الشريعه وما أدفنك

وصله وصله شفتك امگطعين جسمك
شلون أدفنك يابوفاضل بيش ألمك

يالــضيعتـلي الراي

ما قصرت وياي
​

عن يتاماك وعن حريمك بالنيابه
اعتذرلك يمكن انبات ابخرابه
عگب عمري وياك بالعز والمهابه
ادخل اعله ايزيد وبجفه شرابه

ادري صعبه عالرمح راسك يشاهد
اوگف آنه ابمجلس ومروان گاعد

لو اعتب ابشكواي

ما قصرت وياي
​

للشاعر: ميرزا عادل اشكناني