قايدني الدمع والنوح (مكتوبة) - باسم الكربلائي

گايدني الدمع والنوح
دافن مهجتي وعمري
خطواتي بثگل همّي
جاوز كل صبر صبري
مظلومة يا فاطمة
محرومة يا فاطمة

گلبي الذاب شاف مصاب
لاچن ما مثيله إمصاب
هدم حيلي وأنا بحيلي
من خيبر قلعت الباب
ليل أحزان لا ما هان
عمري إندفن جوّه إتراب
يروحي بحسرتچ زيدي
دافن مُهْجتي بيدي
صار النوح ترديدي
راحت فاطمه منّي
ومن المصطفى عذري
مظلومة يا فاطمة
محرومة يا فاطمة

كبر جرحي وطُفَه صُبحي
ليل أظلم نهار اليوم
جره دمعي وألم ضلعي
لن شفت الضلع مهشوم
بجمر حزني إبتده ونّي
أمسيت بجرح ملچوم
دارت عكس أيامي
سكنت لحد أحلامي
الليله أولادي أيتامي
زينب لَوَن تنشدني
عن أمهه تشب جمري
مظلومة يا فاطمة
محرومة يا فاطمة

دَفِن بالسر گلت أصبر
وصيّه وملتزم بيها
گبر مخفي عن الأنظار
حكمةْ ربنا أدريها
يحيدر عن گبر فاطم
الوادم لا تدلّيها
زادت لوعِتي وهمّي
أمس أم الحسن يمّي
لون الدمع من دمّي
معذور الدمع من دم
على بنت النبي يجري
مظلومة يا فاطمة
محرومة يا فاطمة

گلبي الشاب من إنصاب
سهم الشامت ايلوحه
بيّه إحساس ما ينقاس
مثل واحد دِفَن روحه
ياهو الشال مثلي جروح
خلّي يسولف جروحه
راواني الزمن كلشي
بجنازت حلم أمشي
حسبالك شلت نعشي
وهذا الگبر يا هالناس
أصبح هالمسه گبري
مظلومة يا فاطمة
محرومة يا فاطمة

حگهه الروح وين اتروح
وأم الحسن ما هيّه
مناحه العمر واسنينه
على الراضيه المرضيّه
بس رب العرش يعلم
أصبح چم جرح بيّه
جرحي بفگد أم البيت
جرح أيتامي بي عانيت
جرح الوحّدي ظليت
منهن من كثر همهن
الربنا فوضت أمري
مظلومة يا فاطمة
محرومة يا فاطمة

يعرفوني فتى الإسلام
بس شِيمَتْهُم يغدرون
لوما هالوصيّه تصير
موت أحمر تره يلاگون
أمْحيهم وحگ فاطم
وهُمّه بهالأمر يدرون
وحگ الضلع والمحسن
أصَفّنْها الإنس والجن
أخلّي إعداي تهرب مِنْ
سيفي ويشهد الفقّار
حليفي وشاهد النصري
مظلومة يا فاطمة
محرومة يا فاطمة

للشاعر: عمار هليل الواسطي