حرامات (مكتوبة) - باسم الكربلائي

 

 

حرامات . يعيني ابچي عليهم
حرامات . شمر يحدي ابسبيهم
امگيدات إعله الهزل
حگه يحتار العقل

بعد مذبح وليها الحرم شيصح بديها
ابخيم محروگه وگفت خيول اتلف عليها
اسمعت واحد ينادي كلامه اشسوه بيها
التتناني ايجيها عباس تأيس مايجيها

ارتفع صوت . كسر والله دليلي
ارتفع صوت . وداعا ياكفيلي

تنسبي يا اباالفضل
حگه يحتار العقل

استحاله الحره تطلع سبي وهيهات اقنع
الأجت كافلها عباس تظل ابسوره تگبع
لچني اتأكدت حين شفت جسمه توزع
گلت شاء الله هاليوم الكفاله اوياه توگع

ابوگت طاح . فقط تكفي الإشاره
ابوگت طاح . گلت راحوا إساره

الما يصح إلهن مثل
حگه يحتار العقل

السبي مايخفه همه شمس مصباحه عتمه
اشيحس الفارگ احباب ويلاگي شمر يمه
اليدقق سمعه بالليل يفرزن كلمه كلمه
تأخر والدي هواي متى يجيني يعمه

على النوگ . أسمعت بإذني حچيها
على النوگ . تظن يگدر يجيها

تحلم إيعود الشمل
حگه يحتار العقل

ضعينه وكلها آلام مشت بالصحره أيام
الزمن أجبرها تالي تطب مسبيه للشام
اليحلفون ابخدرهن وسافه بيد ظلام
بعد كل المهابه ابخرابه لازم اتنام

على الگاع . يحسره اعله السبايه
على الگاع . ينامن آيه آيه

والفگذ كافل يذل
حگه يحتار العقل

تجمعهم رزيه بنات الغاضريه
يتيمات ونعيهن وصل حد الثريه
لچن زيد عذابي بچي الطفله رقيه
اريدن والدي اتگول يجيني ابـهالمسيه

يحراس . الطشت لا لا تجيبوه
يحراس . گلب طفله تكسروه

ما اظنها تحتمل
حگه يحتار العقل

أبد ميضيع هالثار يظل عد صاحب الثار
المفدى المهدي بيده يرجع حگ الأطهار
يجي كل فكره عاشور ويرد النار بالنار
تشد ظهره ابظهوره ثلثميه من الانصار

يجي بثار . گمر فوگ الشريعه
يجي بثار . نحر جده ورضيعه

وثار ربات الحجل
حگه يحتار العقل

 

للشاعر : عبداللطيف خالدي