كربلاء (مكتوبة) - باسم الكربلائي

كربلاء . يالأخذتي الصبـح
كربلاء . واني آخذ رمـح
كربلاء . باقي يمچ گمـر
كربلاء . كربلاء

كربلاء من التعب مانستراح
واليجيچ ابلا جرح يرجع جراح
چنتي ظلمه واحنه جبنالچ صباح
تالي ردينه سبي وروس برماح

بالله . ليش ماتوا من الضمه
بالله . ليش تنشتم فاطمه !
بالله . ليش ماروانـه النهر
كربلاء

بالسهم راس الطفل وامه تصيح
جسمه يم جسم الأبو يمچ طريح
يعني حته الـ بلمهد يرجع ذبيح
من يميل الراس أحس گلبي يطيح

من يميل . راسه من الهوه
من يميل . احنه نوگع سوه
من يميل . ناگة أُمه اتعثر
كربلاء

راس ابو الغيره تهشم والأسير
من يثبتونه برمحهم مايصير
ابرگبـة الناگه تعلگ بالمسير
ظلت اعيونه علينه تستدير

بالعمود . راس اخويه انهشم
بالعمود . عالرمح مارهم
بالعمود . حته گلبي انكسر
كربلاء

راس اخويه أبلا ملامح يا مُعين
حافر ابعينه وحوافر عالجبين
باقي بلحيته أثر چـف اللعين
مغيره اوصافه ابو گلب الحنين

ياذبيح . تنسحگ جثته !
ياذبيح . ينظر لعيلته !
ياذبيح . خنصر إيده انبتر
كربلاء

هيه كل خطوة سبي ابطول المصاب
واليتيمه طيره بأنياب الذئاب
صرنه مانعرف بعضنه من التراب
الفاگد الغيره ولــه أم الحجاب

يازمان . راحت أم الخدر
يازمان . ويه سوط الشمر
يازمان . مو ذبحني القهر
كربلاء

إحدي ياحادي الظعن دربك طويل
إحدي ماعندي زلم غير العليل
إحدي لكن هالله هالله بالكفيل
ويه كل خطوة سبي راسه يميل

بالطريق . وني ماينسمع
بالطريق . بس سوالف دمع
بالطريق . نايبات وخطر
كربلاء

من چنت ويه إخوتي كلهم ضواي
امشي محروسه وابوفاضل وراي
من بعد ذاگه الخدر محسوفة هاي
هسه چـتال إخوتي يمشي معاي

وين اروح . من عيون العدو
وين اروح . عندي ما ظل أخو
وين اروح . من سهام النظر
كربلاء