ليـلة من ليل الحشر ليـلة سبيها
كعبة وانشـد ابـسلاسل چـف إديها
شجرة وطيور النبـي التمت عليـها

الليلة نيران الخيم صاير ضواها
والگمر عالمشرعة وتارك سماها
بيها زينب كالحمامه وخوف إجاها
واليتامه اطيورها وتفتر وراها

فرشت اجناح الحنان إعله اليتامه
والحمامه اجروح متروسه الحمامه

تبچي واملاك العرش تبچي لبچيها
شجرة وطيور النبـي التمت عليـها

لو مشـت ماچن مـره وبين السبايه
جبـل تمشي اتگول بـس لابس عبايه
الرايه ماطاحت بقـت حته النهايه
راس زينب چـان ويه الروس رايه

راسها المرفوع راية ابچف أخوها
إلسانها الفقار عوض سيف أبوها

غيرة الله وغيرة العباس بيها
شجرة وطيور النبـي التمت عليـها

اشلون ماضربت وجها بيوم عاشر
والسيوف اتشوف ضربت بالمناحر
هيه وصت عاللطم يأهل الشعائر
من بده الميمون يلطم بالحوافر

قد ضربنا الظهر من ضربوا ظهـرها
ونزف دم الروس من طبروا گمـرها

والبچت لحسين قد واست نبيها
شجرة وطيور النبـي التمت عليـها

من تشوف اچفوف تذكر چف اخوها
الـهذا ضمو اچفوفكم لمن تجوها
روحوا عطشانين زينب وانتخوها
وابرضيع حسين حته اتذكروها

الماي لتجيبون طاري الماي يمها
خاف تذكر جربة الغالي وسهمها

من جرحها اخذ الحذر يالتعتنيها
شجرة وطيور النبـي التمت عليـها

تنسبي الكعبة لـيزيد ابيـا عقيـده
وتضرب حورية الجنة الوحيـده
الضرب زينب كون أخو زينب يصيـده
يگطـع إيده من گبل مايـرفع إيـده

حته ضي الشمس مايگدر يمرها
الريح ترجف من تشب زيحة عطرها

الموت لو عباس حاضر مايجيها
شجرة وطيور النبـي التمت عليـها

•
الله ماخالق بشر زينب مثلها
قبل لتدنگ الكعبة اتدنگ الها
مشت ماعثرث ادروب الشام كلها
چن جنح جبريل مشدود ابرجلها

رغم ذيج المذبحة العنها سمعتها
كـل صلاة الليل صلتها بوقتها

چن رسول اتگول ربك مصطفيها
شجرة وطيور النبـي التمت عليـها

زمن خلاها سبيه بقيد اسرها
زينب الچان الأمير يطيع امرها
معطره ابعطر الورد جابت عمرها
هسه دخان الخيم ريحة عطرها

مشت لأرض الشام كل خطوة العقيله
بألف عام ومن عمر زينب قليله

لچن هيبة حيدره بهيبة مشيها
شجرة وطيور النبـي التمت عليـها

كذب كلمن گال مهزوزه وضعيفه
هاي رفعة راس للعتره الشريفه
والله لو ما مهزلة يوم السقيفه
ابد ماشافت سبي الحره العفيفه

ولا ذبيح حسين بأرض الغاضريه
ولا يظـل كرسي الحكم بيد آل أميه

ولا مشت زينب أسيره ابلا وليها
شجرة وطيور النبـي التمت عليـها