إقبليني (مكتوبة) - باسم الكربلائي

 

 

اقبليني شاعر و خادم مطيع
رافضي يقدس حجرات البقيع
بالزجية .. بالسبية .. اقبليني

اقبليني جمره طفرت من خيمكم بالطفوف
جمره صلت عالمناحر وانطفت لكن تشوف
وجرتها دموع زينب من بجت يم الجفوف
زينب الصلت جلوساً والشعر صلى وقوف
خادم يصلي ابحضرتج ركعتين
اقرأ بيهن وا حسيناً وا حسين
وبدموعه .. وبضلوعه .. اقبليني

إنتي أمي وانتي أمة وانتي أم الأمهات
إنتي فاطم وانتي فاطم وانتي فطم الفاطمات
إنتي ام الماي انتي وانتي ام الكل فُرات
إنتي بس انتي الصحيتي وجانت الوادم سُبات
اي نعم قبرج علامه للدليل
لكن نشوفه منارات الكفيل
بالكفالة .. بالرسالة .. اقبليني

انتي ما شفتي المخيم لكن ابگلبج خيام
عين المفارك حبايب ما تغمض من تنام
السهام تريد صدرچ تدري بي ريحة أمام
انتي انشودة ضماير من قيامج للقيام
لو مشيتي خطوتج موكب عزاء
كربلاء انتي وبعد ام كربلاء
يالوفية .. بالرزية .. اقبليني

من بعد طيحة بنينج انحنيتي چن هلال
خضتي حرب اللا تراجع وانقتلتي ابلا قتال
بس حرام الگاع جانت وانتي خضرتي حلال
يا مره الرفعت عشيره ودنگت يمها الرجال
بت أسد جابت علي القالعله باب
وأنتي جبتي الكافل اليقلع رگاب
هذي عينج .. وبحسينج .. اقبليني

چفج الشال أبو فاضل هذا جف الكبرياء
لو نزل ينزل شريعة ولو صعد يصعد دعاء
دمعج اليطفح قوافي تغوص بيه الشعراء
زينب ام لكل مصيبه وانتي ام لكل وفاء
تعلمت منج اذا جرحي أليم
اصبر واصبر واكول الله كريم
بالمصيبة .. بالغريبة .. اقبليني

گنطره الدنيا ومسافه وانتي عالمنا الوسيع
واليعيش ابلايه موقف ميت واسمه يضيع
الما تهزه الغيره راسه يكشخ ابذبحة رضيع
والغيور لدمعة اخته يفزع ونحره گطيع
من سمع زينب يبو فاضل تصيح
شالته الغيره وگعد لكن ذبيح
وبدماءه .. و بلواءه .. اقبليني

ولد حوه اثنين جانوا والحسد سبب دمار
وانتي ولدج اربعتهم صاروا ادروع وستار
ابن ابوهم مثل ابوهم هذا تفكير الكبار
بس يكول احسين كالوا اربعتهم صار صار
من يصيح حسين ركضوا كالسباع
صاحوا ابشر سيدي وامرك مطاع
بالأخوة .. بالمروة .. اقبليني

الصغير الينسه فضلج عيشي يــ أم گلب الجبير
إنتي يالگلبج إمارة ما يضم غير الأمير
الما تربي حيود مثلج من عسن عاجر تصير
غيري شافج دمعه تجري وانه شفتج بس ضمير
من يمر اسمج أحس صكة سيوف
جن ابو فاضل تلاكه اويه الصفوف
بالغوالي .. هذا حالي .. اقبليني

 

للشاعر : السيد عبد الخالق المحنه