متت مرتين (مكتوبة) - باسم الكربلائي
منذ ٩ أشهر١٥٧مشاهده
لطمية متت مرتين مكتوبة
الرادود باسم الكربلائي
متت مرتين بغيابك متت مرتين
على افراگك على إمصابك متت مرتين
شكثر ونيت .. ولا مليت
نعه الناعي او رحت اركض على اشعاره
يبشر الما رجع هم يرجع لداره
يناعي البين ابني شنهي اخباره
لطم وجهه وسكت وعيونه تتجاره
على المحبوب خبرني على المحبوب
يرد لو لا دجاوبني على المحبوب
بأمل ظليت .. ولا مليت
بقه يعدد بنيني وانه ناطرته
وانه عنهم وحقك ما مناشدته
اكله حسين عنه يا خبره جبته
يكلي عالنهر ذبحوا كفيل اخته
صحت ويلاه عالكافل صحت ويلاه
بلا چفين ابو فاضل صحت ويلاه
عمر ضحيت .. ولا مليت
يناعي كطعت كلبي دجاوبني
تراني مدولبه وحجيك يدولبني
دحاجيني يرد لو ما يرد ابني
غيابه يجرح وحجيك يعذبني
يرد شلون يالحره يرد شلون
حوافر داست ابصدره يرد شلون
وانه التانيت .. ولا مليت
سألته زينب الحره اشجره اعليها
يجاوبني بعد ساعه و تشوفيها
اجت من السبي روحي تلگيها
اساليها اشجره اعله ابنج اساليها
بلا عباس جابوها بلا عباس
اكيد اجناب شافوها بلا عباس
جمر شبيت .. ولا مليت
رحت اتلگه زينب وانه محنيه
شفت ضعن السبي وهاج الالم بيه
ادور وين زينب ضاعت اعليه
اميره راحت ورجعتلي مسبيه
صحت يا ويل يحبيبه صحت يا ويل
اشوف رموشج امشيبه صحت يا ويل
طحت ونعيت .. ولا مليت
يزينب انتي زينب لا تحيريني
ييمه ما عرفتج والله اعذريني
تكلي اني زينب لا تضيعني
اعذرج ياليحنينه ما عرفتيني
دكولي شلون ما ميته دكولي شلون
واخويه ابلا نحر شفته دكولي شلون
الج ناديت .. ولا مليت
حرت مدري شكول بهاي حالتها
دمع عيني بقى يحجي ويه دمعتها
سلام ابلا سلام ولا سلامتها
اصبرها وتصبرني لمصيبتها
اشجره اعله احسين علميني اشجره اعله احسين
تكلي لا تذكريني اشجره اعله احسين
انه العانيت .. ولا مليت
ردت أسأل سؤال ودمعتي لاجت
بعد طفله يزينب بالضعن ما اجت
قبل ما جاوبت يا ابا الحسن نادت
تكلي بالخرابه اعله الطشت ماتت
رقية وين عفيتها رقية وين
اريد اسمع بواجيها رقية وين
انه اشتاكيت .. ولا مليت
للشاعر : السيد عبد الخالق المحنه
التعلیقات