والله لو موجودة بالطف (مكتوبة) - باسم الكربلائي

 

 

والله لو موجوده بالطف
أم وهب ما عجبّتهم
هيه ترمي راس ابنها
وانه ارمي اربعتهم
هذا طفي وغاضريتي
من ينافسني إبقضيتي

أنا المختارني الكرار
أنا الأم المثاليه
فحول العرب ربتني
او عشك حيدر كبر بيه
حزامية ريادية
رسالية سياسية
غديرية حسينية
إمامية فدائية
ياعلي غيرلي إسمي
تحكم اعليه الضروره
إسمي فاطم و ادري إسمي
يجرح احسين ابشعوره
گلي من هسه وفيتي
من ينافسني ابقضيتي

اشوف حسين واتفاجى
يصير الحال مو حالي
أشاهد فاطمه ابعينه
وابو الحمله يتراولي
اريد انده له يا ييمه
واخاف وينشده بالي
أمامي وسيدي أفضل
وبعض مرات يالغالي
مو عطف واجب احبه
هو ابني وهو ديني
من يكلي يمه يمه
هالارض ما تحتويني
لو بچه اطلب منيتي
من ينافسني إبقضيتي

بقيت مراقبه يكبرون
واخاف من الغدر واحذر
لچن من كبرت الاولاد
احس جرح الطفوف أكبر
أُهم يمي واحس ابعاد
وانه الفركاهم اتحضر
اكول شلون افاركهم
بعدهم بيمن اتصبر
يا نشامه احسين اخوكم
وضحت قصدي او مرامي
لحد يكله يخويه
كولوا مولاي او أمامي
هذي يأولادي وصيتي
من ينافسني إبقضيتي

لوني إبكربله أوياهم
من نقضت عهدها الناس
إحترامي لأم وهب شتصير
إذا أتنخه بالعباس
و اگلها شوفي لجل احسين
إحسبي ينشمر جم راس
وحشم و اگلب الميدان
ها يسباع حدنه انداس
يأم وهب شكرا جزيلا
بس أنه أم الأفاضل
والله لو ولدي عشيره
أشمر الرؤوس أو أقاتل
يأم وهب ماقصريتي
من ينافسني إبقضيتي

وحق الزهره لو يمهم
لأسوي الما يجي بعده
أهوس يم أبو فاضل
و أشد إعصابتي إبزنده
و گله يبني هذا الجيش
أريدك وحدك إترده
وخلي الخيل فوگ الخيل
و اسمع للزلم شرده
ما أريد الجود بيدك
إمشي يا بدر الهواشم
هالنهر كله إغرفه
او ديره بخيام الفواطم
إبني ياحارس ثنيتي
من ينافسني إبقضيتي

فقط زينب تنافسني
ونا ام البنين أقنع
إهيه إتعثرت بثنين
واني أتعثر أبأربع
أظن نتساوه بالمصرع
أخوها او إبني المكطع
لجن تغلبني بالعباس
يفزعة ام و اخت تفزع
آني هم أمها و احبها
كلبي يتگطع عليها
أغله من عباس عندي
والشرف بوسة إديها
بنتي مولاتي او هويتي
من ينافسني إبقضيتي

بلا تقصير وتعذر
واكول النار ما تطفي
انه قبري تزوره الناس
وقبر ام الحسن مخفي
وانه شما بالغت وانطيت
كلت هذا ولا يكفي
ردت قبري وقبر فاطم
اوزعهن حسب عرفي
كربله بيها الغوالي
شنهو رأيج يالوديعه
انتي قبرج بالمخيم
واني قبري عالشريعه
هيه ممكن لو رضيتي
من ينافسني إبقضيتي

 

 للشاعر : السيد عبد الخالق المحن