يا قابض الروح (مكتوبة) - باسم الكربلائي

 

 

يا قابِض الروح اِستمِع نوحي
گبْل السِمه للطف إخذ روحي
حاچيني عالأربع راويني كل مصرع
گبْل السِمه للطف إخذ روحي

ها يالإجيت ابخَتمة اَقداري
اعليك السلام ابخَنگة اَعباري
أُم البنين اْو تعرِف اَخباري
مو روحي بس، خل تنقبُض ناري
ابلوعاتي چنَّك عالِم اْو داري
اوياك الملايك تنحَب ابداري
حَيهُم ملايكة الأجل حَيهُم
گد ما بچوا حَسّيت اَنا أُمهُم
طالَبتك ابمدمع راويني كل مصرع
گبْل السِمه للطف إخذ روحي

عندي طلَب مِن يسكن اونيني
أنتظره چنت ابآخر اسنيني
روحي إلك واِقبضها مِن عيني
بس اَطلُبك للطف تودّيني
اْو صدِّگني مِن أسأل عن ابنيني
مو قصدي هُمّه المقصَد احسيني
أرد اَعرف اِمن اَنظُر مصارعهم
اشچانت لَبو اليمّه صنايعهم
جاوبني خل اَسمع راويني كل مصرع
گبْل السِمه للطف إخذ روحي

ممنونه لِلّي ايحقِّق امرادي
صِير ابمُهُجتي الوالِهه حادي
گبل السمه عرِّج على الوادي
ذاكه التِگِصده بضعة الهادي
يندَل حنيني اْو عالجِهه اينادي
ابلا خارِطه، مِن ريحة اولادي
اِمن اولادي أَنظر مصرع اِثلاثه
اِيظَل مَصرع اْو أتنطّر اَحداثه
وينه الذي اتگطّع راويني كل مصرع
گبْل السِمه للطف إخذ روحي

عگب الثلاثه تِشبح النظره
صوب الشريعه اللي غدت حمره
صوب الركضله احسين بالحسره
صوب البگه ابلا يمنه لا يسره
ابهالمصرع احسين انكسر ظهره
واِنكشف لعيون الشمر نحره
عين الصواب اللي اِنعُرف رايه
صاب السهم عينه اْو هِوَت رايه
اِلـ عباس اَريد اَفزع راويني كل مصرع
گبْل السِمه للطف إخذ روحي

بالطف تحوم الروح مختنگه
وابكل أثر إلها فَرِد خفگه
أَنظر بقايا اخيام محترگه
اهنا زينب اتشاهِگت چم شهگه
اهنا صارت امتون الحرم زرگه
واشچم طفل خيل العده اتسحگه
واَنظر بقايا من مهَد خالي
واِمهاد اِلاَبيض أحمر اگبالي
أنشِد عن الرضّع راويني كل مصرع
گبْل السِمه للطف إخذ روحي

خِذني ابشعور الحزن ينتابه
اْو حاچيني عن احسين وامصابه
إرويلي كل موقف مع اِصوابه
اشلون اِنفجر من حرمله اخضابه
اْو وين اَهوىٰ مِن مُهره على اترابه
حين الرمح بالخاصِره صابه
وابدمعتك ودّيني للمذبح
بس لا تفصّل بالحچي اْو تشرح
واِختمها بالمضجع راويني كل مصرع
گبْل السِمه للطف إخذ روحي

گلت الطَلَب وابحزني أتنهّد
للطف إخذني اْو للسمه إصعد
جسمي على افراش الردىٰ امّدّد
لاخِر نفَس ما نازِعه الأسوَد
روحي اِجهِزَت واَعضاي اَحِس تُبرَد
إمهلني بس خلّيني أتشَهّد :
أَشهَدُ أَنَّ اِحسين كِل حِزني
واِبحزني هذا ينغمُض جفني
روحي إذا تطلع راويني كل مصرع
گبْل السِمه للطف إخذ روحي

 

للشاعر : علي السقاي