قد وردنا الآن (مكتوبة) - باسم الكربلائي

قد وردنا الآن .. ابن ملجم خان
سيفه خضب بيه .. هامة الايمان

اتخضبت هامة علي وتاج الامامة
بين ابوجهه السمح ضي ابتسامة
قلت انفاسه وبده يذبل كلامه
وابتده جرحه الترف ينزف يتامه
الملكين الـ بالصلاة وگفوا امامه
واندعوا يرجع للمصلى ابسلامة
كلشي ساكت صار .. ابطبرة الكرار
بس انين الناس .. من وره البيبان

بردت الكوفه وبده يخفت نبضها
صوت اهلها الساجدة تبجي ابفرضها
لحظه بيها الوادم اتصبر بعضها
صعبه تتخيل وقعها وتفترضها
يا چفن دمعه العلي يگدر رفضها
اطلابة اليفگد محب محد يفضها
دمع الـ يونون .. طفه ضي اعيون
الما يهل ادموع .. گلبه ينزف جان

زينب اگبال الجرح يسرح فكرها
وينفرط عقد الدمع وتلم صبرها
تلتفت لأخوتها والحيره بنظرها
ايعين الله الخايفة اليلهب جمرها
من يصد الها علي ويفهم امرها
ايكلف العباس ابني احرس خدرها
والابوها يروح .. كل گلبها جروح
يبقه اثر فرگاه .. عالچفون يبان

كل يتيم مبين الهم اعله عينه
الباب حيدر بالمسه وداه حنينه
خيّم الليل اعله الوجوه الحزينة
كلها تسأل عن امير الرحمة وينه
بين اليگول ارد اوفي ابعمري دينه
وبين اليگول ارد احط روحي ابيمنه
ضجه يم الباب .. بيها صوت احباب
لوحه عنها يصير .. ما يفي العنوان

اگباله بالهم ذو الفقار ابغمده ينحب
ايگله يا صاحب حياتي ابدونك اتعب
لو رحت عني وشفت ريح الهجر هب
وعد مني وداعتك يم گبرك اذهب
بارده ابدونك قبضتي ولوني شيّب
واني ابچفوفك گبل بالمعركة الهب
بالوداع احتار .. حتى ذو الفقار
تحني ظهر السيف .. فرگة الشجعان

حيدر اتهيأ قبل وقت احتضاره
قبل احسين ودعه و أده الزيارة
عاين النحره وبجه ابحسره ومراره
ادموعه جانت بيها عن الطف اشارة
اتخيله من تنقتل ربعه الغياره
جسمه دامي ويوضع الراس ابجواره
والاخو الوفاي .. طايح اعله الماي
عالخيام تحوم .. رهبة النيران

كل خبر عمره لحد وقت استماعه
بس جرح حيدر محال اتحده ساعة
كلشي بي حيدر علي بي من طباعه
حتى ذكراه تنحسب خصلة شجاعة
ذكره من يامر على الروح اتباعه
والسنين اتصيح اله سمعا وطاعة
عدنه بيها اثبات .. ذكره خمسة اوقات
ينسي لو يوم .. ينسي الاذان

 

 

للشاعر : ايهاب المالكي