آه والله شمصيبة ياعلي (مكتوبة) - باسم الكربلائي

 

 

آه والله شمصيبه يا علي
بيدك توسد الحبيبه يا علي

يا نهر خجلان يشكي من الضمه
يا گمر يحمل على جفه السمه
بهيده ودعها العزيزه فاطمه
عاشت وماتت غريبة ياعلي
بيدك توسد الحبيبه يا علي

شلون تگدر تحبس بجفنك دمع
صعبة تخفي ونتك يالمنفجع
من شفت سطرة وجه كسرة ضلع
گلبك اشطفه لهيبه يا علي
بيدك توسد الحبيبه يا علي

ياللي عديت المصايب والمحن
اشحال گلبك سيدي يا با الحسن
وانته وحدك لبست فاطم چفن
هاي والله العجيبة يا علي
بيدك توسد الحبيبه يا علي

جاوزت ايوب بحدود الصبر
نفذت اعظم وصية ابهالامر
فاطمة بيدك تنزلها الگبر
هذا صبرك من يجيبه يا علي
بيدك توسد الحبيبه يا علي

شلون تحمل فرگه لو لحظة غياب
صعبة عاليفگد حبيب ابعز شباب
هواي اصعب وحدك اتهيل التراب
صدمتك صدمه رهيبة يا علي
بيدك توسد الحبيبه يا علي

يالرجعت الدراك ودافن امل
سيل دمعك حتى يم بابك وصل
اشجاوبت الحسين عنها من سأل
يكسر الگلب ابنحيبه يا علي
بيدك توسد الحبيبه يا علي

حايره زينب وما تدري شتگول
والحسن وياها بالحسره يجول
وين امنه فاطمه الزهره البتول
والله ليلتهم عصيبه يا علي
بيدك توسد الحبيبه يا علي

هذا عهد الشيعه باقي للابد
نفتخر يا سيدي ابهالمعتقد
فاطمه وانته وعترتك يا سند
صاحب الطلعه القريبه يا علي
بيدك توسد الحبيبه يا علي

صوت الزجية فاطمة ... اويلاه يفاطمة
ودعني يا حامي الحمه ... اويلاه يفاطمة
گتله وجبيني الضمه ... اويلاه يفاطمة
هذا الفن يجري دمه ... اويلاه يفاطمة
للحشر منهم ناقمه ... اويلاه يفاطمة

هاي الزجيه الطاهره ... اويلاه يفاطمة
ماتت حزينه وصابره ... اويلاه يفاطمة
ورده وتنام ابمگبره ... اويلاه يفاطمة
من توصل السيد الوره ... اويلاه يفاطمة
تحجيله عالصار وجره ... اويلاه يفاطمة
منها الضلوع مكسره ... اويلاه يفاطمة

وبابي
الخاين خان ابن عمي .. وبابي
وسيقفة ساعده صارت .. وبابي
عليه شاهده ضلعي .. وبابي
ودمع عيني وطفل مكتول بيّه

ناراه
وحك الما نشوفه لجن .. ناراه
ابقلبنه وشع شعاع الشمس .. ناراه
باب ام الحسن ما طفت .. ناراه
وشعل حزن الليالي الفاطمية

 

للشاعر : الحاج عقيل فرهود الكربلائي