دارك هالمسه (مكتوبة) - باسم الكربلائي

 

 

دارك هالمِسَه وحشه و حزينه
طفت شمعةْ حياتك يا علينه

على بابك أثر چف النبوه
وعلى بنت النبي دفعوها گوه
عِصَرها الماله دين ولا امروّه
لئيم وما حفظ حرمةْ نبينه
طفت شمعةْ حياتك يا علينه

حرام نسمّي هالعدوان أصحاب
بَري منهم رسـول الله والكتاب
جنين إلّي سگط يم عتبة الباب
يظل شاهد على أصحاب الضغينه
طفت شمعةْ حياتك يا علينه

الله يعينه گلبك يا أبو حسين
شفت بالطاهره مكسور ضلعين
شفت آثار سطرةْ حقد عالعين
يريت الصابها إنشلّت يمينه
طفت شمعةْ حياتك يا علينه

يتيمه بيا بخت زينب يتيمـه
بدت هاي المسه أول هضيمه
يحيدر والحصل أكبر جريمه
گلبك ما سكن لحظه ونينه
طفت شمعةْ حياتك يا علينه

دارك مظلمه أمست يكرار
يلن خصمك طفاهه شمعة الدار
بدمع من دم بچيت الأم الأطهار
ونفس هذا الحزن يا علي بينه
طفت شمعةْ حياتك يا علينه

تغسلها بدمع عينك يغالي
الله يساعدك صعبه الليالي
ثگيل النعش گمت تحس يوالي
نعش وأملاك ربنا إمشيّعينه
طفت شمعةْ حياتك يا علينه

هدم حيلك تره فگد الزچيه
يبو اليمه وعشت أصعب رزيـه
منـيّه وتِـهْدِم الحيل المـنيّه
الله يعين صبرك يا ولينه
طفت شمعةْ حياتك يا علينه

 

للشاعر: عمار هليل الواسطي