لا يا نبض (مكتوبة) - باسم الكربلائي

 

 

لا يا نبض لا تبتعد يظل بالي
ارجعلي لا تاخذ عمر شخص غالي
رحت اليا ارض .. جاوب يا نبض

بدونك فاطمة يخفت ضواها
نجمه وتترك الوحشة ابوراها
يا دمعة التصبرني ابجفاها
وجه الدنيا يفرغ من وراها
هاي القبل وكت الحزن تواسيني
من اتعب الجرف الصبر ترسيني
لو صلت فرض .. جاوب يا نبض

سولف يا نبض لا تبقى سكتة
رايح بس رجعتك مدري يمتى
ذابل ليش گلب الزهره عفته
هذا التدخل الناس اعله بخته
هذا الگلب بي دنيتي وامل روحي
من يبتعد يترك اثر على جروحي
ونبضي الينخفض .. جاوب يا نبض

هاي اسألتي يمك مو غريبة
تعرف يا نبض حجم المصيبة
لوعة واحد يوادع حبيبه
وگلبه من الحزن ماخذ نصيبه
انساها صعبة بالدمع يمر ليلي
ذكرى اثر كسر تهد حيلي
دمعي الينتفض .. جاوب يا نبض

ارجع يا نبض لو بس ثواني
خلها تصير الايتام ابمكاني
هاي الچانت ايامي واماني
لا تتعوض ولا الها ثاني
الها بحياتي منزله والف خاطر
ما وفه عنها لو كتب الف عاشر
ذكرى وتنحفظ .. جاوب يا نبض

ارجع يا نبض حتى استمعها
وتگلي منو الكاسر ضلعها
اذا سولفت تتذكر دمعها
من البسمار والباب الدفعها
گالتلي دين اهل الغدر جذب ثاري
ما خافوا الله من اجوا قرب داري
كلمتهم نقض .. جاوب يا نبض

​اريدك يا نبض يرجع زمانك
واني انطي نبض گلبي ابمكانك
ترد الگلبك ويرجع كيانك
تسمعك زينب وتغفى ابأمانك
والزهرة تحيه والدمع يرد غافي
ما اشيع احلامي ابنعش على اچتافي
خليني افترض .. جاوب يا نبض

موتك يا نبض يحصد ثمرتي
عليها حفرت ابصوتي عبرتي
اعاين خالية الدنيا ابنظرتي
يبحر قارب همومي بحسرتي
بسمي اذا نادت علي يفز شوفي
المح ضوة من فاطمة على حروفي
ضي وينلفظ .. جاوب يا نبض

 

للشاعر: إيهاب المالكي