آنه أم الأربع (مكتوبة) - باسم الكربلائي

 

 

أنا أُم الأربع إسمع نوحي
الفجِر اشما يطلع تطلع روحي
فرضي اْو صلّيتك
يَمهاجِر بيتك
الفجِر اشما يطلع تطلع روحي

أنا أُم البِنين الهاجَت اَحزاني
الفجِر أُم الوِنين اليوم سَمّاني
الأذان ابلايه صوتك حيل أذّاني
العزا وكت الفرض أصبح فرض ثاني
ابعالم كئيب عشت النَحيب
أصعب شعور فگد الحبيب
العگِل اِستَبعَدها اْو شك ابموتك
وَلا صَدَّگ لو ما مَر تابوتك
حي اِتمَنيتك
يَمهاجِر بيتك
الفجِر اشما يطلع تطلع روحي

شِجاني الدوم بالقُرآن أتكلّم
عليك الفاتحه اِمن اَقراها أتلعثم
اِشعِمَل بيّه عَدو الرحمن اِبِن مُلجَم
الفجِر عندي اِقتِرَن طاريّه ويّه الدم
وَاذكر نداء وحي السماء
لمّن نعاك وَاعلن عزاء
الهُدى رُكنه اتهدّم من هالضربه
وَانا مِن ساعتها اِلهسه ابرهبه
بالخوف اِبچيتك
يَمهاجِر بيتك
الفجِر اشما يطلع تطلع روحي

شَگِلّه اليعتقد أتعوّد اغيابك
وَانا اندفنت حياتي كلها بترابك
بعدني ابصدمتي وَاستذكر امصابك
وَاذكر من إجيت اْو ينزف اصوابك
المَسندها بيك ركضت عليك
اْو مخضوب اجيت وامسَنِّديك
علي إدعي اِلگلبي الله ايصبره
ترى ما راح اَگدر أنسى الطبره
ذكرى اْو خلّيتك
يَمهاجِر بيتك
الفجِر اشما يطلع تطلع روحي

تِفارَگنا اْو صِوَر بفراگك اَتذكّر
اِبسَم السيف أذكر لونك اِتغيّر
اشكثُر يا بالحسن أقلقني هالمنظر
وجهك لو صَفار اعصابتك أكثر
ابأمّن يُجيب أدعي تِطيب
اْو خَيَّب رجاي حچي الطبيب
چِنِت اَرد اَسمعها اِمشافَه اْو سالِم
اِسمَعِت اِعهَد عَهدك وَدْع الوادِم
تِرجع ياريتك
يَمهاجِر بيتك
الفجِر اشما يطلع تطلع روحي

ذِكرتك وانته تنظر زينبك واحسين
اْو مِن عباس عينك تِلمح الچفين
علي نام ابأمان الله قَرير العين
أنا اِعليمن جبِتلك أربعه اِمن اِبنين
احسين اشيريد يحصل أكيد
مَولى اْو إمام واحنه العبيد
علي ثِق واِطَّمَّن زينب عندي
خَدَم اِنصير اِلها آنه اْو وِلدي
محفوظه اِوصيتك
يَمهاجِر بيتك
الفجِر اشما يطلع تطلع روحي

اعله گبرك من گبُل ما دمعتي تنشَف
علي اِمن اليوم اَبشرك حتى گبْل الطّف
بِنينك ذولا وانته الأدرى والأعرف
سهله تضحيَتهُم بالنحر والچّف
انحور اْو چفوف برض الطفوف
اْو عين الكَفيل هم تنطي شوف
شنو رايد أكثر إحنه ابأمرك
اللِّبَن البي رضعوا راح ايخبرك
تعرف تربيتك
يَمهاجِر بيتك
الفجِر اشما يطلع تطلع روحي

علي مهما تريد اَكثر ، من اعيوني
أشِد اِلكربله من يثرب اظعوني
ركض للتّل أروحن مو مشي ابهوني
اْو عوَض بنتك شمر خل يضرب امتوني
واشچم يتيم بالبر يهيم
أركض وراه دون الحريم
إذا رايد أطلع ويّه الخدّر
ابسبي فدوه اِلزينب خل اَتيسّر
أُؤمُر لبيتك
يَمهاجِر بيتك
الفجِر اشما يطلع تطلع روحي

إذا يا بالحسن تكليفي ما أطلع
أظل ابيثرب اَدعي اْو أذرف المدمع
لچن أتمنه لو عندي بنات اَربع
يحِضرَن للعقيله ابحين تتلوّع
أربع بنات تشبه صفات
أربع بنين بالتضحيات
وَلا أسأل عنهن گبل الحُرّه
مهو زينب بنتك أُمها الزهره
فدوه اِلغاليتك
يَمهاجِر بيتك
الفجِر اشما يطلع تطلع روحي

للشاعر : علي السقاي