دهرك راد غيابك (مكتوبة) - باسم الكربلائي

 

 

دهرك راد إغيابك
والطف راد أحبابك
ناس إتضدك .. وانت إبلحدك
علي

علي ويه الجروح اتطول سالفتك
علي إشعندك ذنب والناس كارهتك
عدل ميت بني سفيان لاحگتك
خلص بين اليتامه والصلاه وكتك
عرفناهه يحيدر خاتمة قصتك
نفاق الناس موش الطبره كاتلتك
رادو قتلة دينك
عِد ما تغمض عينك
يعني إتحسدك .. وانت إبلحدك
علي

عله بابك صفوف أيتام متحشده
حياره والطلع من بيتك إتنشده
أبونه إشلون وضعه ياترى إشعنده
لبن جبناله حتى إنشربه ونضمده
يبويه ندعي ربنه يومك إيبعده
قبل عيد الفطر عدوانك إمعيده
سالم وحنه إبدالك
ونته إتظل لعيالك
كلمه إتضهدك .. وانت ابلحدك
علي

وداعا من كلت والكل يسمعونك
سكت صوتك وجو يمك يحاجونك
يكول احسين شنهو العيشه من دونك
تعلمت البواجي الخاطر إعيونك
مثل توديعك الفاطم يودعونك
مدامع زينب البيها يغسلونك
زينب تركض تعثر
صاحت حيدر حيدر
دمعه إبخدك .. وانت إبلحدك
علي

إجتك زينب أوراعي العلم كاعد
تكلك هالزمن من زينب إشرايد
تشبگك وانت تعرف شبكة الفاكد
مثل شبگة الأم العدها هالواحد
تصيح اليوم موتي أو فرحة الحاسد
بعد منهو اليسدها خلة الوالد
موتك حرگة خيمه
رايح واحنه بهيمه
هاي إتكعدك .. وانت ابلحدك
علي

علي ويه الزجيه إنصب المأتم
لأن فتشت إعيونك ينقتل بالسم
يجيبوله طشت يملي الطشت بالدم
وذا زينب إجت عنها الأثر ينضم
يخاف إعليها لاكن ياطشت أعظم
هذاك البالخرابه أوراس المهشم
حال الـــــيفگد ابنه
طبعه يموت ابونه
سموا جبدك .. وانت إبلحدك
علي

علي طف كربله كل صبرك إيهدمه
عله احسينك تشوف الناس ملتمه
خيول اتدوس خيل إتطشر إبجسمه
بحيث إعياله تسأل وين أبو اليمه
لأن إبمصرعه موجود بس دمه
حوافر تاخذه أو خل زينب إتلمه
شافت كطعة نحره
سمعت كسرة صدره
كطعو زندك .. وانت إبلحدك
علي

علي أعظم مصيبه إعليك أفهمها
مصيبة زينبك من حركوا إخيمها
فراشه والمخالب ما توالمها
تموت ولا ونذل حاقد يكملها
ابن ذاك اليشتمك رد يشتمها
غريبه وخايفه وعباس مو يمها
نادت بويه إحضرني
بس لا تتعذرني
أسمع ردك .. وانت إبلحدك
علي

يحيدر من مشت للكوفه محتاره
يكولون ابيسر بنت الحمه جاره
شماته وكل شخص منها طلب ثاره
كفيلج وين زينب ضاعت أخباره
رموها بالحجي ويرموها بحجاره
تهبط مستحه ودموع تتجاره
صاحوا خل نهظمها
شتموا حيدر وامها
شامت عندك .. وانت بلحدك
علي

للشاعر : السيد عبدالخالق المحنة