لا اخذت الثار (مكتوبة) - باسم الكربلائي

 

لا اخذت الثار .. لا گبر ينزار ‏
انا ذنبي اشجان .. يابويه ‏

اجيتك يالگلت بعدي اول ملتحق بيه ‏
ادري الشوفتك مشتاگ تنطر جيتي يوميه
اگعد خل اسولفلك اجيت ولكن اشجيه ‏
اخبرك عن كسر ضلعي لوعيني المطفيه ‏
الي ظل تذكار .. على باب الدار ‏
للألم نشيان .. يا بويه ‏

لمن ردت بدموعي اطفي جمرة الحسرة
زعلوا من بجيت عليك بصدري ذبحوا العبرة
طلعت من المدينة بخوفوالله بحالتي الادره
تحت ظل شجرة من آويت گاموا گطعوا الشجرة
بگه صبري وياي ..صفه سهم ابچاي
عمري بيت احزان .. يابويه ‏

ناس الخجل ما عدها شيفيد من اعاتبها
عليها استحوذ الشيطان نساها ذكر ربها
عن حق الوصي وفضله ونص البيعة اطالبها
بالباطل تريد اقبل ولا احجي واحاسبها
علي خير الناس .. علي تاج الراس ‏
يشهد القرآن .. يا بويه ‏

رادوا عن خطاب الحق بكل حالة يسكتوني
ولا افضح خيانتهم الداري بغدر گصدوني
عنهم لذت خلف الباب واسمعهم يشتموني ‏
بين الباب والحايط عصرة موت عصروني ‏
اسأل من الباب .. بيمن الاصحاب ‏
جازوا الاحسان .. يابويه

علي الجنت انتظر منه ياخذ ثاري وثاره
وصيتك يا رسول الله سدت حلگ فقاره
علي اليتسمه حامي الجار وتلوذ الدنيه بكتاره
بوجوده ياهو اليصدگ شراذم هاجموا داره ‏
علي سر الكون .. عفه صبره شلون ‏
فارس الفرسان .. يا بويه ‏

الاصعب من كسر ضلعي وامري الابد ما مألوف
داحي الباب للمسجد ينگاد بحبل مجتوف ‏
تگوده المن خياله تخاف وراسه يا وسف مكشوف ‏
واگباله انسطر خدي وبعيني بعد ما اشوف
صبرك المريود .. جاوز المحدود
جارت العدوان .. يابويه

گتله يا علي وياك حگي يطوّل عتابي
بوجودك ما يمسني الضيم هذا ياعلي حسابي
گتله من يحل موتي غسل جسمي بثيابي ‏
على گلبه خفت ينصاب لمّن ينظر صوابي
يا حمه الاسلام .. يا ابو الايتام ‏
قبلة الايمان .. يا بويه ‏

من گتله بظلام الليل اخذني ادفني يا حيدر ‏
ما اريد الـ آذاني خلف اجنازتي يحضر
اخذني والدمع يجري وجدمه ابمشيه يتعثر
شلون القلع اكبر باب يحمل نعشي ما يگدر
علي كل انصاف .. علي عالاعراف
قاطع البرهان .. يابويه ‏

 

للشاعر : سيد سعيد الصافي الرميثي