من حبر الصحيفة (مكتوبة) - باسم الكربلائي

  
من حبر الصحيفه .. واقلام السقيفه
كتبوا عالحطب .. ممنوع العتب
لعيون الخليفه
سافرت وعيوني مامرها الوسن
عن حقيقه دورت مو عن وطن
ونزلت لرض القديمه والفتن
شاهدت مصحف يمزگ بي وثن
ها يتاريخ  إشكثر تخفي محن؟
جيتك أنفض عنك إغبار الزمن
بأوراق القديمه .. تخفي كم جريمه؟
وضحلي الخبر .. واكشفلي الصور
عالهجمه العنيفه
شاهدت قطعة حطب تحت الترب
كتبو إعليها عبارات الرعب
لو حجر يقراها هم دمعه يصب
إقتلوا الزهره واعلنوها حرب
مو ذوي القربى بعد ماكو قرب!
لاعرج طه ولا نزلت كتب
نقتلها إبصلافه .. والغايه الخلافه
شورى بالقتل .. هجموا بالفعل
عالزهره الشريفه
كمت أصفح والحوادث تنرسم
عن عظيمه إنقتلت إبلايه إثم
نعمه نزلت والبشر ما تحترِم
للشكر مخلوقه لا مو للشتم
ترفه مثل الورده ونحيلة جسم
والورد وي الجمر ماينسجم
يالقاتل إبنها .. لا تسطر جفنها
ياجف الحقد .. ذبّلت الورد
واستعجل خريفه
صورة العصره يريدلها دمع
فاطمه عالحايط إنطبعت طبع
ها يبسمار الصدر ما تنشلع
الا تكسر حيدره أو تكسر ضلع
هذا باب الله إعله فاطم يندفع
ها يتاريخ إشبعد ماتقتنع
شيل اسم الصحابه .. واكتبهم عصابه
كالوا معذره .. ما نقصد تره
حجتهم ضعيفه
هاذي صورت منكسر فاكد أهل
هذا حيدر حاير أو كله زعل
دمعه يصعد للسمه أو كلبه نزل
منحني ظهره أو على صدره جبل
بالله يا خير العمل شنهو العمل
والعزيز إحسين إجه للمغتسل
من يفتح چفنها .. وينام إبحضنها
بدموعه الحمر .. يهتز الكسر
ويعاود نزيفه
إمشي وتعثر يحماي الحمه
إنت ما شايل نعش شايل سمه
انت شايلك وطن ينزف دمه
وحشه هالليله أو طويله أو مظلمه
دنيه مو دنيه تره إبلا فاطمه
هيه راحت والمصايب قادمه
دافنها إبألمها .. ملعون الهظمها
و ارجع يا وفه .. زينب خايفه
حالتها مخيفه
فاطمه أو زينب جرح مايندمل
وحده عصروها والأخرى إعله الهزل
فاطمه إبخدها أثر سطرت نذل
أو زينب إبجفها أثر شد الحبل
صافن اعليها علي أو يذكر قبل
لا ملامح والشكل غير الشكل
حيدر من وصلها .. ظل إيباوعلها
متغيره إشكثر .. من ظيم اليسر
واستقبلها ضيفه

 

للشاعر : السيد عبدالخالق المحنه