مسلم ضرب (مكتوبة) - باسم الكربلائي

 

 

مُسلِم ضرب بالكوفة زلزاله
صحّ اللي گال الرجُل بفعاله

لابس غضَبها او جدحَة اعيونه
چنّه ابوفاضل من يزعلونه
ابسيفه خُبَطها او ما طلب عونه
واحد ابواحد ما يلاگونه
ابكثرَة عددهُم ما شغل باله

صيت البواسل لايذ ابصيته
من حيدر الكرار تربيته
موت او فرض عالكل توابيته
اليدّعي بيها شرد تاليته
يتختّل او خايف امن اخياله

بالكوفة سوّه حَظَر وانذَرهُم
والهوا ايسِدّه لو نوه ايمُرهُم
سوّه شوارع من مناحِرهُم
اشگد گبل هاي الحرُب حَذَّرهُم
ما يرحم اللّي يوگف اگباله

طوعه تهلهل ترتجز بسمه
اعليهُم يمسلم يا فخر عمّه
ابصولتك لتروايهُم الرحمة
إفنيهُم ابهجمة بعد هجمة
سيفك أريدن يكتب اقواله

ناده يطوعة او داعتچ بشري
خيبر أرجّعها واجي ابنصري
هالناس بيّه خانت او تدري
عن كل خيانة ثَمَن دم يجري
آنه العذاب ابلونه واشكاله

تاج السفارة لايگ اعليّه
منّ الحُسيْن او أحلى منيّه
آنه الثقه ليَه او دره بيّه
عرش الخنوع أسحگه ابرجليّه
المثلي صعوبة تحصل امثاله

ما حنه راسه راسه ظل عالي
أخذوه اسير او هوّ ميْبالي
ابسطح الإمارة هيبته اتلالي
سلّم عله حسين او بچه الغالي
منّ السطح طيْحوه عله ارماله

السيف يطاوع بجفي يطوعه
الربي بطاعة حسيني يطوعه
الحلفني وگال اصيرلك كطوعه
نكرني وصار ابن طوعه عليه

من فوك القصر للكاع مرماي
مثلك يالرضاك بهاي مرماي
على شفاف فلا يحسين مر ماي
عطش مثلك متت وانداس بيه

ريتك والمشاعر بيك يحسين
رجيت الرب اليه بهاي يحسين
اشعر لو صحت لبيك يحسين
الغيره من السمه تنزل عليه

 

للشاعر : صفاء الخالدي