يالماكو بغلاتك (مكتوبة) - باسم الكربلائي

 

 

يالماكو بـغلاتك .. مالـكني ابصـفاتك
ياوردة وعطـرها ايـطول اسـنينـي
يوسف في جمالك .. والهـادي ابكمـالـك
يصبيها ونظـرها ويا كحـل عينـي

يثمرة عمري وآمالي .. اعز من روحي يالغالي
يبدر النورت ليلي ابتمامك
شحلاتك من تحاچيني .. تصابحني وتماسيني
يفرحني ويسر گلبي سلامك
عباره ابوجهك اقرها .. وداع وحسره معناها
يجاسم اگعد وگلي ابمرامك
گلتلي اشموعي علگيها .. بعد والحنه عجنيها
علامك بدلت رايك علامك

اتنطر زفافك .. حيرني اختلافك
جاوبني ايصراحة يبني جاوبني
ياروضة حياتي .. نسيانك مماتي

هالليلة انتظرها ابلهفه تدريني

اتاني وحلمي تأويله .. گلت يتحقق الليله
واشوفن عمك اليكتب كتابك
واگول امنيتي يوليدي .. احني اچفوفك ابيدي
اثاري حسابي مايشبه حسابك
يجاسم ينقبل عذرك .. زغير اعله الحرب عمرك
ييمه وبعدك ابعزة شبابك
تموت الوالده ابموتك .. اسمعـك يرتجز صوتك
خطاب الفارس الانزع خطابك

مكتوب ابجبينك .. احساسك يقينك
من شجرة الاصلها جنة الباري
وتگول ابإرادة .. عازم عالشهاده

والدنيا فخرها ابنصرة الدينِ

قرارك يبني ماكسره .. ولو گلبي صعب قهره
يناوي اعله الشهاده من رضاتك
وصية والدك ذمه .. واشوفك عازم ابهمه
تحقق امنياتي وامنياتك
اذا رايد تودعني .. شعوري هذا وسمعني
حياتي يبني مرتبطة ابحياتك
اريدنك تعاهدني .. إذا انساك رايدني
اخذ مني خواطر ذكرياتك

اتنفس وجودك .. مااحمل صدودك
يالوصلك هواها ابعازتك ريتي
خيمه اعليه اشوفك .. مااگدر اعوفك

والعشره اشگصرها البينك وبيني

رباك اهوايه تعبني .. حلم فرگاك شيبني
واگول ان شاءالله خير لبدالي
يساورني أمل وعدك .. واناغيك واهز مهدك
والولي يالولد واحسب ليالي
واگول ابيا وكت تكبر .. غصن عمرك اشوفه اثمر
واشد عيوني وي طولك يغالي
اجيت اتريد تودعني .. وداعك يعني شيعني
غيابك ماخطر يوم اعله بالي

يوليدي دخيلك .. يضهدني رحيلك
يا أول عذابي وأول جروحي
لاتگطـع وصالك .. لاتنسـى دلالك

بعيوني وسهرها وتعبي جازيني

امك لو رحت عنها .. بعد ماينگطع ونها
وشحال الأم التفگد أملها
تريدك تگعد اوياها .. تمسح دمعة ابچاها
تترك اثر كل دمعه التهلها
زفافك حصلت منه .. بس النوح والونه
يالوحيد الغيرك ماكو إلها
كل حسابها وهمها .. حاضر رادتك يمها
تغمض اعيونها ابساعة اجلها

صاحت يازماني .. أم واطلب حناني
وارباي ودلالي وحلمي وامنيتي
عمري ابهم گضيته .. ياذنب الجنيته

والحسره جمرها ابگلبي يچويني

اودعك يصعب اعليه .. وداع ابلا أمل جيه
يبن الحسن دخلك حيرتني
امك وانتظر زفتك .. اشو لابس چفن شفتك
بيه اشلون لو رحت وعفتني
على هونك يبعد امك .. بعد عندي طلب يمك
تشيل اجنازتي يالواعدتني
خاف الزمن يهضمني .. من شوفتك يحرمني
على وجهك الباسم عودتني

من بعدك يغالي .. يبگه البيت خالي
من كبلك عساني الموت وافاني
ترجعلي مرادي .. ياثمرة فؤادي

دنيايه ابغدرها اتريد تسبيني

جسام اهدعش عمره .. وامه بأمل تنتظره
تتناني اوليدها سالم يجيها
لكن من بعد ساعه .. ابنها الحلوه اطباعه
گمر ينزف دمه راجع عليها
جابه للخيم عمه .. يعين الله گلب أمه
تفسر الصخر نبرتها ابنعيها
فوگه انحنت مذهوله .. تشمه نامت ابطوله
ومن دم منحره حنت اديها

ونة ثكلة ونت .. من بعده تمنت
لا طول نفسها ولا هوى اتشمه
مفجوعه وغريبه .. وصبري منين اجيبه

والونة أثرها يبني ياذيني

للشاعر: السيد سعيد الصافي الرميثي