يكرهوني وأحبك (مكتوبة) - باسم الكربلائي

 

 

يكرهوني واحبك ، يمسحوني واكتبك
انه جرح الخيم ، انه خادم خدم
ياحسين،، ياحسين،،

يحسدوني لإن حُـبك سعاده
وانه من انحّسد اعشگ زياده
عنيد ومعجب ابگلبي وعناده
احبك حب محمد للعباده
"لاوجودي ابلا وجودك
أجرع المُر إعله مودك"
اجيك امن النهايه
شحبك مو كفايه
ولا شفت الندم
انه خادم خدم
ياحسين ، ياحسين

انه لطمة صدر أول محرم
انه التطبير من ايهوس الدم
انه ناعي الزچيه واني مأتم
انه الجمره البقت من المخيم
"صوتي وي صوت المناير
ياهله ومرحب يزاير"
خذت اعلى المراتب
صرت إبن المواكب
انه هيبة علم
انه خادم خدم
ياحسين ، ياحسين

احس ماعرفك وافهم كلامك
اذا مااشعر ابطعنة سهامك
ولا ازورك ولا اعرف مقامك
اذا ما انچوي ابجمرة خيامك
"وافهمت والي الوالي
يعني ما اطعن موالي"
سمح آني وغلاتك
مهم عندي رضاتك
تره رغم الألم
انه خادم خدم
ياحسين ، ياحسين

احبك وانته تستقبل منيتك
احبك والدمه خضّب لحيتك
بناتك صاحن وثارت حميتك
گمت بس العطش ثگل مشيتك
"خطوة الضامي ثگيلة
والخيم بيها عقيلة"
عرفتك وانته طايح
تعيش وكولشي رايح
وانه گتلك نعم
انه خادم خدم
ياحسين ، ياحسين

حلم عمري أمّر لحظه إعله بالك
أذان انته وانه أحسبني بلالك
اقبل اتراب اقدام المشالك
وابوس ايد البچالك والقرالك
"غيري يحسبها ندامه
واني احسبها كرامه"
دعيت وعندي هاجس
اموتن بالمجالس"
انه وضعي انحسم
انه خادم خدم
ياحسين ، ياحسين

يشوفونك ضعت تحت الحوافر
واشوفنك مقـام وبيّ منـاير
ولا شايف ظهر يشبگ خنـاجر
ضـماير ينزف وخضر منابر
"من عسى اچفوفي گطيعه
ولا دموعك عالشريعه"
دمع ابچي اعله جرحك
شريد ابچي اعله ذبحك
حقيقه مو وهم
انه خادم خدم
ياحسين ، ياحسين

اشوفك ضامي بس تنضح شهامه
لگيتك منحني بس بإستقامه
رغم مذبوح بس بيك ابتسامه
نعم واگع لچن شفتك قيامه
"دمعتك چانت اشاره
تنچوي بيها الغياره"
رجـائي والتمّـني
اشـوفك راضـي عني
وانه قاسـم قسّم
انه خادم خدم
ياحسين ، ياحسين

وقاري شفته من افگد وقاري
وابالغ بالهضيمه وبإنكساري
وانام اعله التراب ودمعي جاري
وادگ اعله الصدر ليلي ونهاري
"حتى لو بالدم فديتك
ابقى اشعر ماوفيتك"
بقى ينبض ضميري
لئن أنته اميري
انه بعدك عدم
انه خادم خدم
ياحسين ، ياحسين

للشاعر: السيد عبدالخالق المحنة