نتيجة غيبتك (مكتوبة) - باسم الكربلائي

نتيجة غيبتك ابيض رمش عيني
اذا ما ألزم ايدك شلي ابچفيني
تعال اسمع
حچي المدمع
على غيابك ...

شتگول . معقول . تعيش الشجره لو گطعوا جذرها
احساس . والناس . شماته وكلمة الوينه اشكبرها
امرار . عالنار . سفينه رويحتي وبعدك يجرها
دنياي . وياي . حمامه اونازل اعليها صگرها

تعال.الدمع الاحمر يطلب امجازه
تعال.العلة علة وعازتك عازه

ماترجع
وجه أطبع
على ثيابك

حنيت . ماجيت . لون المدمع يروح ابرساله
انطيك. ورويك . وانا دمعي ابكبر جود الكفـاله
افكار . واخبار . أشوفك محتمل لو إستحاله
چم أوف . والخوف . ولو ادري الشرف صعبة احتلاله

يوحشتكم طفل عايش مع الموته
مثل وحشة نبي ذنـون بالحوته

مثل حالي
بلا والي
واجه امصابك

يا لون . وشلون . يوجه الخير بعدك بيش اصابح
ياروح . وتروح . يبحر العافية گلب المسامح
غدروك . حرموك . وحگك لترس الدنيا نوايح
حيران . عطشان . يماي اوجوهنا گالولي طايح

گلولي لشكثر ضامي يا ابو الاكبر
واظن ماي الفرات ابصدرك اتبجر

بعد عمري
خذك دهري
ولا جابك

يالعين . يحسين . احس مقصرة وعيون الزچيه
يالكيف . ياحيف . وگعت اعله الارض موش اعله اديه
رجواي . مولاي . اصيرن گاع وتمدد عليه
مرضوض. مفزوض. عليه اتدوس خيل الاعوجيه

الف حيهم أصيح اودمعتك ديره
واذب اعصابتي يم راس أبو الغيره

واصيح ازئر
يسبع البر
بده اجوابك

خفگات . حسبات . تاخذني وترد بيه المچاني
يبعيد . تعويد . عرفتك ماترد ليه واتاني
وياك . بجفاك . ثلاث اسهام ابن كاهل رماني
صاباك . وضناك . والثالث مرد عيني وعماني

انا ام البنين الما صرت غيمه
واظلل عاليتامه ابحرگه الخيمه

اضل ابچي
واضل احچي
انا وبابك