إذا بالسلطة هارون (مكتوبة) - باسم الكربلائي

 

 

إذا بالسلطه هارون .. يمولاي
تظل بالحفره مسجون .. يمولاي
ولا خلفك يصلون .. يمولاي

ملخص هالوضع بعد القراءه
قليله التحسن أو كثره الإساءه
نشوف المذنب إبثوب البراءه
يحب الظلمه بغضا بالإضاءه
اذا للجاني ننقاد .. حرامات
نكثر بيك الأصفاد .. حرامات
صعوبة الما يميزون .. يمولاي

إذا طاع العقل أمر الخرافه
يصير اللاوعي سيد الثقافه
او يظل اللارشيد اعله الخلافه
او يظل نعشك على جسر الرصافه
اذا مانشفي مجروح .. يمجروح
بعد للأسوأ إنروح .. يمجروح
نجيب الموسى فرعون .. يمولاي

امر هارون وتنفذ كلامه
وبده السجان يفرض بأنتقامه
يگله قلل الماي وطعامه
واريد السلسله اتكسر عظامه
ثگيله اعليك الاغلال .. يويلاه
دموعك والدمه سال .. يولاه
بونينك يستراحون .. يمولاي

جنت تتألم وترجو المنيه
لأن يمك شماته وناصبيه
لأن سجانك يسب الزجيه
يعذبوك بشتم صبح ومسيه
حديد وسب والآلم .. بالدموع
عشتها اخمسطعش عام .. بالدموع
طحت بين اليبغضون .. يمولاي

بده هارون خايف من مصيره
رغم انت مكبل بالحفيره
رغم حراسه خايف من اسيره
طمع ما يعرف الدنيه گصيره
ملك يتصوره يدوم .. يعاديك
غشيم الفكر بيوم .. يعاديك
يظل كل عمره ملعون .. يمولاي

لا زال الامة تقنع بالتنازل
ابد ما ترتقي وتصنع مناضل
يگيديونك يثائر يا مقاتل
عبيد الدنيا تحكم بالسلاسل
لون الامة احرار .. يطيعون
ابد ما ترضه بالعار .. يطيعون
سبات ويمته يصحون .. يمولاي

ظلامك دامس ومتوهجه شمسك
كلام الناصبه انياب وايفرسك
اشد مبغض الك خلوه يحرسك
اذا تتلفت ابوجهك يرفسك
عبيد اثلاثة آذوك .. يسلطان
ولا گدروا يكسروك .. يسلطان
اسد منك يخافون .. يمولاي

 

للشاعر : السيد عبدالخالق المحنه