القاسم وندائي (مكتوبة) - باسم الكربلائي

 

 

القاسم وندائي .. للسبط فدائي
نصرتك شعاري .. بأهلي وبدمائي

هذا يوم الطف اهم يوم بحياتي
بيه اصيرن وانولد مو بي وفاتي
ما تعيش ابذل ابد معروفه ذاتي
راسي يتعله برمح هاي امنياتي
ارفض السلامه .. الأحلي بيها هامه
ابمذبحي افتخاري .. بأهلي وبدمائي

موقفي يا عمي من يوم الولاده
جندي عندك تفخر الدنيا بجهاده
احنه وي طينتنه معجونه الشهاده
ما يلوگ العاشقك موت الوساده
اقسم بحروفك .. لا ولن اعوفك
وانت انت ثاري .. بأهلي وبدمائي

جيتك واعرف بأن واجب وصالك
لا تگلي ارجع يمن روحي فداك
اقره بعيونك حزن اعرف مقالك
‏ امي وصتني انذبح كون ابدالك
ينگطع وريدك .. يا ظناي اريدك
الفاطمه اعتذاري .. بأهلي وبدمائي

عمري يوم الطف بده وبالطف ختامه
ارتجلت للموت احب موت الشهامه
ترابه نادني ابشغف واسمع كلامه ‏
ياهو مثلك والسبط عمه وامامه
والختم حياته .. لجلك شحلاته
قبلتي ومداري .. بأهلي وبدمائي‏

والدي وصاني يا عمي من اشوفك
من اجل عمك تخط بالدم حروفك
يبني واتحني بدمه نحرك جفوفك
گتله اهم من الاهم موتي ابطفوفك
والحسن وصيته .. دم الك هديته
وانت بس خياري .. بأهلي وبدمائي‏

عاشر بطفك حلم طال انتظاره
خلصت عمري بأمل هاي البشاره
بلامتي وسيفي انتظر بس اشاره
هسه واقع صارت وشبلك قراره
هاشمي وطبعنه .. لله بس ركعنه
تشهد البراري .. بأهلي وبدمائي‏

انه فرع من الحسن واكبر بنينه ‏
عمري لازم اختم بطفك سنينه
ارفع اسم المجتبى وانصر ولينه
وام ترجع بالفخر لرض المدينه
واختتم سنيني .. بخدمتي الحسيني ‏
بليلي وبنهاري .. بأهلي وبدمائي‏

 

للشاعر : الشيخ سامي المسعودي