دخلت المجلس (مكتوبة) - باسم الكربلائي

 

 

دخلت المجلس ولا جنها بسبي
هي زينب بس سوالفها نبي
وگفت بعين المله .. صوتها في كربله

گبالها يسولف يزيد ابساسه
مدح روحه تفاخر بحراسه
تقدمت زينب تجر انفاسه
من بدت بالبسمله طم راسه
يا يزيد اشجابك البنت الشيم
وانت ابوك بعمره ما شايل علم
سكت ما بي مرجلة .. صوتها في كربله

رجف من عدد اهلها بالسره
وارتعد من سمع تحجي بحيدره
تخطب وتتقدم وما چن مره
منها گام القصر يرجع ليوره
گام يصرخ گوموا سكتوها الي
ومن يسكته الحق المربي علي
جيش ساكت بكمله .. صوتها في كربله

فكد كيدك واسعى سعيك يا يزيد
انت واشياخك جنت لهلي عبيد
لا تظن تمسح ذكرنا من الوريد
يوم عن يوم الحسين يظل جديد
خل يفيدك مايك البايكني ادين
باجر يوزعونه بثواب الحسين
او تنسمع كالزلزله .. صوتها في كربله

كلمة الها وكلمة يحجيها العليل
لحد ما خف عرشه بالحجي الثگيل
گلها شوفي الروس كالتلي سبيل
ما رأيت بأخوتي الا جميل
ما عطشنه المايك الما يستحي
احنه من نعطش يشربنه الوحي
والعبايه مبلله .. صوتها في كربله

گلها شتريدين اخذي من القصور
تگله اسكت لا اسويهن قبور
انا بنت الوزع املاكه بخور
حتى اخوتي من النحر ردوا نحور
ما تغرني بملكك الما بي ضمير
انا اميره بنت اميره بنت امير
سكت والمجلس حله .. صوتها في كربله

احساب باجر يا يزيد اين المفر
من الضلوع انطلبك لآخر نحر
الليل باجر ينحني اگبال الگمر
كلشي باجر بالسمه يطلبك ظهر
منين تخلص باجر اگبال السميع
وانت حقدك واصل الطفل الرضيع
صفن هو وحرمله .. صوتها في كربله

بعد ما عنده كلام الناصبي
شاف طفله تلوب ما بين العبي
صاح جيبوا الراس للرجعت سبي
اتحرك الصندوگ من صاحت أبي
ركضت ورادت تشمه انفاسه
فتحوا الصندوگ شبگت راسه
ماتت بچلمة هله .. صوتها في كربله

كل بناته التمن وصب دمعته
هاي تشبگ هاي تمسح لحيته
زينب اتشمه وتبوسه برگبته
طفل عالصندوگ هشم گصته
من سمع زينب تدور امتونه
حسين من الخجل سد عيونه
يدري بيها مدلـله .. صوتها في كربله

 

للشاعر : حسام الحمزاوي