عشگتك (مكتوبة) - باسم الكربلائي

 

 

عـِشگتك قُـربةً حُـب لله
وبقيت بـمجلسـك دمعـة وآه 
هــوى الحـُب هـآشـمي
شـَهد لـحمي ودمـي
امـوت ولا هـوى حـسين انسـى

غرامك عشته مو هسه
هويتك في زمن چان
العشگ ممنوع
زمن بي ينحسب خاين
اذا يعلن حزن گلبي
وبچاك ادموع
رسمتك شجرة مايخلص
ثمرها وخنصرك منها
غصن مگطوع
حلاتك تروي بالصحرى
سقاها من العطش دمك
مثل ينبوع

لگيتك بالعسر تمشي وياي
لگيتك بالعطش تمطر ماي

لگيتك مو ضمي
شهد لحمي ودمي
اموت ولا هوى حسين انسى

اموت ابلا عزه ودمعه
عليك وهم ارد احيا
واموت اوياك
مصابك ملتقى جروحي
تلمهن نبرة الناعي
اذا ينعاك
سواد الدنيا وثيابي
غطاي من اول سنيني
اخاف انساك
اكتبك موسم امعاتب
واسامر دمعة اعيوني
وارد اقراك

قريته ابلا ذنب صدره انداس
قريت انا الجسد يرثي الراس

قريته ابـمعجمي
شهد لحمي ودمي
اموت ولا هوى حسين انسى

اجيك ومسحتى عيوني
غريب اوينزل ابابك
دمع وافراح
واسولف جرحك الروحي
سوالف كل حرف بيهن
كلامه ارماح
اجر بذيالي من امشي
وازورك خطوة مذبوحه
ابـ أجر ما راح
اشدلك محمل اهمومي
وطشره گبالك ورجع
گلب مرتاح

اجيلك لو كسر گلبي فراگ
اجيلك وانا الك كلي اشواگ

اجيلك محتمي
شهد لحمي ودمي
اموت ولا هوى حسين انسى

اذكرك والهوى ابصدري
نفس من ليلة العاشر
واگول اشصار
اجول ابخيمة محترگة
لضاها الشاجر امغطي
بنات ازغار
واشوفك عالارض مرمي
واصيح الجنة مذبوحة
بسيوف النار
لحيتك كلها مخضوبة
ابدماك وعينك اتدور
بقايا انصار

وقارك ينخضب بالدم ليش!
وقارك ينحسب عدهم جيش

وقارك فاطمي
شهد لحمي ودمي
اموت ولا هوى حسين انسى

خيالي ايشوفك امگطع
وصل ويحاول ايجمعك
وافز وابچيك
واگولن ياصبر زينب
تشوف ابنادم ابعينك
سهم يرميك
تشوفك تنهض وتوگع
تصيحك وانتَ ماتگدر
تجي وتدريك
تعاين والشمر سيفه
مثل هند وچبد حمزه
يمثل بيك

كريمة منحرك تحچي اسرار
جريمة مقتلك تروي اخبار

جريمة عالمي
شهد لحمي ودمي
اموت ولا هوى حسين انسى

خدمتك وانتَ تدريني
متت بيك وعشت يمك
گلب مكسور
جزاءاً ماردت منهم
ولا صاحب فضل غيرك
ولا مشكور
اريدك لو متت تحضر
شفيع اذنوبي وعيونك
علية اندور
امير اعله الخدم يصبح
اذا من امك الخادم
سمع مأجور

الك خادم وانا عمري افديه
الك فدوة ونذر كلشي انطيه

إلك بس انتمي
شهد لحمي ودمي
اموت ولا هوى حسين انسى

احبك وحدك وبعدك
بشر مايسكن ابگلبي
ولا مسموح
واحب ادموعي من تجري
على خدودي بثواب اسمك
حزينة اتـلوح
ضريحك شايل اهمومي
الثگيلة المنها تتعذر
سفينة نوح
اضيع وجبك ايلمني
غريب واشعر ابحضنك
وطن مذبوح
نزف دمعه الگلب حب
وذاب
نزف قلمي ابغزل شاعر شاب
نزف دم معصمي
شهد لحمي ودمي
اموت ولا هوى حسين انسى

للشاعـر :أحـمد الذهـبي