فوق القصر (مكتوبة) - باسم الكربلائي

 

 

فوگ القصر ينادي بحنانه
يا ابا الفضل حميده امانه
رايح ولا اجيها .. عينك تظل عليها
أمانه أمانه

غربه وبعد مسافه ‏
حيره وغدر وسافه
والينغدر يذكر هله وعمامه
والما اله عشيره
كسرة ظهر جبيره
من يلتفت شامت يجي امامه
مسلم جرح نشوفه
متگيده چفوفه
ومن القصر سلم على امامه
جمرة هضم حسرته
لدرب الضعن نظرته
صار بأحاسيس الدمع كلامه
وي الوفي الغيور بخصاله
وبنيته حميدة اعله باله
والكملة يبتديها .. عينك تظل عليها‏
أمانه أمانه

يا صاحب الكفاله
دمعي كتب رساله
مخصوصه الك يا قمر العشيرة
رايد گبل وصيتي
اشرح الك قضيتي
وبهالعمر ساعة بفت اخيره
بالكوفه جنت اريدك
ترفع علمنه بيدك
وبجيتك ما تبقى عندي حيره ‏
لمن تجيني هجمه
ظهري ردت تلزمه
نتعاون اعله المعركة الجبيره
كلما تجي عليه كتيبه
بيك انتخي واگول اشيجيبه
وبنيتي ادري بيها .. عينك تظل عليها‏
أمانه أمانه

فوگ الغدر شلت هم
بعازة اخو وابن عم
صعبة الحرب لليبقى ظهره خالي
شرد احجي يا بو فاضل
وحدي جنت اقاتل
وانت صرت بالمعركة اعله بالي
لو بيها انت يمي
جان اذبحتلي همي
واهل الغدر ما وصلوا الخيالي
اسمع حجي الشماته
هذا انتهت حياته
واحد انا وجيش اعتنه القتالي
هذا الوضع حسابي بحميده
خوفي تظل غريبه او وحيده
گلبي سمع بچيها .. عينك تظل عليها‏
أمانه أمانه

بالحيله جتفوني
القصر الغدر خذوني
گبال الذي ما يسوه انه واگف
نار الهضيمه تچوي
يا با الفضل شسوي
خانوا عهدهم ساعة المواقف
يا حيرتي وغربتي
عالخد جرت دمعتي
دمعة شرف مو من خصومي خايف
كلمه اعله خدي تجري
ميهمني هذا عمري
خايف عليكم والفتن عواصف
عالخد اخط عباره بدموعي
لا تنتظر حميده رجوعي
من عندي حارميها .. عينك تظل عليها‏
أمانه أمانه

من گربت منيتي
يا ابا الفضل وصيتي
بنيتي تمد جفك عليها خيمه
رويها من حنانك ‏
خل تشعر بأمانك
صعبه تره من تنجرح يتيمه
لو سألتك عليه
لتگلها ما له جيه
خوفي تموت بنيتي بالغاضريه
الها ابو اريدك
نشف دمعها بيدك
نومها بأحضان الوفه الرحيمة
انت مثل ابوها يعمها
وبشوفتك تداوي ألمها
انت صرت وليها .. عينك تظل عليها‏
أمانه أمانه

غدر الزمن اجاكم
باجر عطش وراكم
وبنيتي يذبل بالعطش وردها
يا ساقي العطاشه
تنسى حميده حاشه
انا انمرد من ينمرد جبدها
بجودك يبو الحميه
رويها وي رقيه
ادري علي مو عالعذب نشدها
ولي على حميده
تگلك ابوي اريده
دمعة عتب متسايله اعله خدها
تگول الابو شعلامه نساني
جمر البعد يعمي چواني
تصفگ عتب بديها .. عينك تظل عليها‏
أمانه أمانه

خوفي تجي وتشوفك
متگطعه جفوفك
تصرخ بعد منهو الذي يلمنه
اگعد يعمي اگعد
بينه العده تفرهد
صارت جمر واتهدمت خيمنه
تدري الشمر ضربني ‏
يهضمني من يسبني
انه ورقية بسوطه مارحمنه
بذاك الوكت تحشم ‏
وينك يبويه مسلم
الحگ علينه ذبحوا زلمنه
عينك اذا سهمهم طغاها
بنيتي طفوا وي عينك ضواها
عالمشرعه نعيها .. عينك تظل عليها‏
أمانه أمانه

بعدك تجي الرزايا
تمشي الحرم سبايا
وبنتي تجي وراس برمح تشوفك
بعين الهضم تصدلك
متجتفه وتگلك
بينه انگطع من گطعوا جفوفك
بعينك سهم ولكن
لو نادتك تعاين
تكتب غدر دم ودمع حروفك
راسك نق وريده
عذريني يا حيمده
وتجاوبك يا عمي ما اعوفك
تمشي والك تديره نظرها
وانت ربمح تعاين اسرها
كافلها وبسبيها .. عينك تظل عليها‏
أمانه أمانه

 

للشاعر : وسام الشويلي