هونك عليها (مكتوبة) - باسم الكربلائي

 

 

هونك عليها والرحمه بيها
لا تبدي بحسين الخَبَر إبدي اببنيها
هونك عليها

زين العباد ابحسرته وابغُربة اِعياله
نَوَّخ على اِحدود الوطن وِاستوقَف اِرحاله
ناده اِعله زينب عمّته وادموعه همّاله
اشگد صَدمه ندخل والظعَن مارجعت اِرجاله
خل ناعي يسبُگنه ابخَبر وايهيِّئ الحاله
لا تنصدِم لبوة علي اْو تتفگَّد اَشباله
أُم الغوالِب تبچي اْو تراقِب
راح اُوصي ناعي الفاجعه يرحم بچيها
هونك عليها

صد العِليل اِلعمّته گال اْو حچى ابهمّه
أُم البنين اِمناطره رَجعة أبو اليمّه
الناعي إذا ما سِمعِتَه اْو للرَّجعه مِبتَسمه
يمكن تموت اعله الأثر من شِدّة الصدمه
اْو ياعمّه لو ما عرفُتچ مِن حگها ياعمّه
شَكلچ تغيّر بالسبي مِن لوعته اْو هضمه
اشما يبدي منها اِنقَدِّر حزنها
يالناعي وَاصبَح مُحتَمَل تفگد وعيها
هونك عليها

الناعي گبل ما أَبعثه والعبره تخنگها
اعله ام الوفه أُوصي الحرم لحَّد يفارگها
اْو كل حُرمه أُوصيها إذا باللفهه تشبگها
لَتفز لَوْ اِبلَمسَة مَتِن لچماته تحرگها
أَجلَن مواضيع السبي والليله نغلگها
عن سكنه لا انگول اشكثُر شمر الخنا طگها
هاي الوَصايه اتخص السبايه
اْو عندي وصيّه يا بِشِر مِن تلتقيها
هونك عليها

هم آنه لازم أستعِد هاي اُم ابو فاضِل
أُوگف عَدِل عن لا تحِس جسمي اشكثر ناحِل
أَسدِل طرَف بعمامتي دم اْو دمع شايِل
أَخفي جروح الجامعه اْو لحمي اللي مِتآكِل
اِتنحَّن خواتي لو صرِت وياها مِتقابِل
واعله العدد لا تنتِبِه ما رَد عدد كامِل
ابنظره شِجيّه تفگد رُقيّه
ابهاي اُوصي نفسي ياعلي لا تحچي ليها
هونك عليها

السجاد اَخذ مِعصَم بِشِر گلّه ابگلب شاجِر
دورك يبن حذلم إجه شاعِر وابن شاعِر
إنعي اللي جسمه ابكربله اْو راسه ابرمُح دايِر
ابنص يثرب اتگصدك مَرَه مكسورة الخاطِر
رفقاً يهالناعي إذا گالتلك اشصاير
إبدي اببنيها الأربعه واحسين بالآخِر
اِتهيئها حاوِل بَاربع مقاتِل
لا والله نلگاها ابنعش وامشيّعيها
هونك عليها

إنعي عَمامي الأربعه اتشوف الوفه يظهر
اْو لا منها تستغرب إذا ما چَنها تتأثّر
گِلها البنين اتگطّعوا واتوَزِّعوا بالبر
بس لا تگِلها منگطع خنصر أبو الأكبر
ايعين الله لو تدري الشمر بَحقاده ما قصّر
لو تدري تفصيل الجره اِمن الرفسه للمنحر
مِن هالمصايب تِحثي الترايب
اْو حگها إذا تحفر گبر إلها ابإديها
هونك عليها

مهما أصَرَّت بالحچي واعله السبط تسأل
راقب جوابك يا بشِر وابنعيَك اتمهّل
خَبّرها ذبحوا والدي بس اِحچي بالمُجمَل
لا تروي كل طبره اْو جرح واتفصّل المقتل
گد ما گلبها بي وفه وابإسمه تتوسَّل
تتحمَّل افراگ اَربعه اْو ما عنّه تتحمَّل
لَتفصّل اِلها واتجيب اَجلها
كافي الفگدناهم كِثُر خل نحتويها
هونك عليها

أَحچيلك الما ينحچي الما ردتك اتذكره
اِجبينه الحَجَر صابه اْو نِزَف وانحِجبَت النظره
ابثوبه مِسَح نَزْف الدِّمه اْو صاب السهَم صدره
سهْم ابشِعاب اِمثَلّثه ما يگدر ايجرَّه
اِضطَر ابإدينه يدفعه وايطلعه مِن ظهره
گد ما فُقد دم اِنبُهض واتمَسَّك ابمُهره
ابخاصِرته طَعنه طَيِّحتَه عَنّه
فُرصه اْو إجت يم الشمِر لابُد يجيها
هونك عليها

 

للشاعر : علي السقاي