ما عايف سبينه (مكتوبة) - باسم الكربلائي

على كل حال ما عايف سبينه
او من فوگ الرمح عينك علينه

إنته راسك فارس او رمحك فرس
اويانه طالع للسبي مثل الحرس
والله كل ما ينزل او يصعد نفس
ابراسك انشوف الدرب في انترس
يمن ميت عدل تحمي الظعينه
او من فوگ الرمح عينك علينه

باليسر عينك على اعيالك دوه
و ابظلام الليل شيباتك ضوه
اتوزع اعلينه أمان اويه الهوه
ننذبح لو ننسبي نبقه سوه
تحت ظلك يبو اسكينه مشينه
او من فوگ الرمح عينك علينه

راسك ابراس الرمح طالع گمر
گمر بس ابجبهته اصواب الحجر
اعيونك الذبلانه من طول السهر
لحظه ما سديتها ابدرب السفر
متت لاكن بقت روحك حنينه
او من فوگ الرمح عينك علينه

من نشوفك ما نحسك منذبح
ابظهر رمحك نوگف انصلي الصبح
و الفجر يطلع علينه امن الرمح
ابحچي الشامت ريجنه انفكه ابجرح
راسك ما غفه او لا دار عينه
او من فوگ الرمح عينك علينه

فوگ نوگ الهزل عدينه الدرب
إيد تشگف سوط و ايد اعله الگلب
تغضب او دم من نحر راسك تصب
لو شفت علويه يمك تنضرب
شفت سوط الشمر شمسوي بينه
او من فوگ الرمح عينك علينه

يم بناتك بالك او دمعك يهل
خاف لا توگع رقيه امن الهزل
شفت چف اسكينه مشدود ابحبل
بالسبي كلشي صعب ماكو سهل
نطلع من مدينه انطب مدينه
او من فوگ الرمح عينك علينه

يبو اليمه اتعينك الزهره اشفت
اويه الظعينه امسافر ابراسك چنت
مره فوگ الرمح مره بالطشت
او عالحرم كل ساعه عينك تلتفت
إذا خفنه نأشرلك بدينه
او من فوگ الرمح عينك علينه