موتي سهل (مكتوبة) - باسم الكربلائي

 

 

موتي سَهل بس جرحي مو سهل
اهلي سفن وآني امشي عالهزل
مايهمني السبي ما انكسر
حرگوا خيمتي وآنا ستر
خيام خيام

دنيه تغيرت ما اگول طبع ابن ادم تغير
نعطش واحنه ابونه الماي وامنه بسورة الكوثر
جا مو نعمة الله حسين ليش اعله الثره مطشر ‏
يم الله وسمع جبريل صوت اعظامه تتكسر
شمس الضحى يا سورة الضحى
تجوي بجثث طحنوها بالرحه
دهري بموتتي ما ينتظر ‏
حرگوا خيمتي وآنا ستر
خيام خيام

ما خفت اني من النار ساعة حرگ المخيم
هو المثلي شايف ضيم گلبه اعله چوي معلم ‏
بس انه الهضمني حسين شفته امگطع مقسم
من گد عليه مسحوگ لو شنسوي ما يلتم
صاير وصل من شدة السحگ
وهنا حرت حلمانه لو صدگ
سحگوا نعمتي وما تنغفر ‏
حرگوا خيمتي وآنا ستر
خيام خيام ‏

شيفيد العتب وي ناس حتى حچايه ما تسوه
جابولي الضعن والنوگ وين التمشي بالگوه
ماكو اسم الله من تميل ناگه بضعن المروه
من گطعوا نحر عباس گطعوا ريحة الخوه
ريحة اخو ما خله هالدهر
ماكو نفس بخواني بس نحر ‏
ذبحوا عشرتي بيوم اليسر
حرگوا خيمتي وآنا ستر
خيام خيام

چان المحمل اويه الغيم نجمه الكافل يصعده
مثل السعفه يرجف ليش ماكو اليعرف يشده
هز راسه وزعل عباس رايد ينزل يسنده
عاينلي بخجل من شاف لا من جفه لا زنده
فوگ الرمح وعيونه عالضعن
يدري المشت ما عدها اي وطن
صاحب نخوتي وينه شمر ‏
حرگوا خيمتي وآنا ستر
خيام خيام

رايه انه اعله زند حسين جف الزهره عاگدني
كلما اعثر بممشاي زوده بروحه يسندني
لكن حيرتي من الناس لو شامت تناشدني ‏
وين اخوانج وما اگول بس الله يساعدني ‏
اعثر وارد من هيبته انتجي
ادري المشه ما اعوضه بالبجي
خيمة هيبتي بيها استتر
‏ حرگوا خيمتي وآنا ستر
خيام خيام

الحاجب دومه فوگ العين وانه اعله الزمن حاجب
امشي وي الضعن بالليل ماكو كل قمر غايب
قام ابواجبه ومشكور واخته تكمل الواجب
بس لو سكنه گالت وين زينب مدري شتجاوب
لو بالدرب سألتني عالگمر ‏
ما تحتمل لو اگلها عالنهر
تنزل دمعتي من تنذكر ‏
حرگوا خيمتي وآنا ستر
خيام خيام

ما تعبني درب الشام لبوة واگطع الصحره
واحتل منبر ابن زياد وانصب مأتم بقصره
واحجي ويسكت الديوان واطلع منه منتصره
لو جيت بگلب مكسور مو معناها منكسره
هذا القدر من ربي هالوعد ‏
واني وهلي وي الله عالعهد
رفعة هامتي ابقى افتخر ‏
حرگوا خيمتي وآنا ستر
خيام خيام

 

للشاعر : احمد الذهبي