سمع الله (مكتوبة) - باسم الكربلائي

 

 

سمع الله لمن بكى على الحسين

يا نديم الدمعة فك للدمعة باب
ضيع بالغربة دخان بنص ضباب
تاخذ بايديك مولاتي الرباب
و ترزق عيونك لهيب أحزانها

إعطش ولا تنشد على الماي وين
ولا تدور عليه ولا تنطي العين
الماي شح و يبس لسان الحسين
و فَطَّر شفافه و سلب عنوانها

لا تكابر صير بدموعك صريح
إبجي للباقي على الغبرة طريح
رفرف لحزنه مثل طير الضريح
مهرة الحب لا ترَخّي عنانها

الدمعة صوغة من المخيم للضمير
لا تردها و وين ما تلقاها صير
إيد اللي يبوسونها بيوم الغدير
بيوم عاشوراء يظل ردانها

كَحِّل عيونك رماد من الخيام
الدنيا درع إبليس و الرَمّاي إمام
جاور الرَمّاي و انجه من السهام
و اخلص من الوادم و شيطانه

من عقب ما ذبحوا إبنه بصدر أبوه
تخَيَّل حسين بعظمته يسَلَّبوه
لو تِخَلِّص عمرك تصَيِّح يِبوه
كربلاء ما تنخمد نيرانها

حل خريف الروح و انزاح الربيع
نَدَّت غيوم السماء دم الرضيع
ضيع يم الزهراء تعبك ما يضيع
بالحشر روحك مبين مجانها

 

للشاعر : محمد البشير