يجوز الراح (مكتوبة) - باسم الكربلائي

يجــوز الراح .. يرد وارتــاح
( ولو رمشـة )
واصـيح النــار .. يـراعي الــدار
( الك وحشـة )

مشيـت ودنيتـي دارت
يـخيمـة بعاصفـة وطـارت

( الك وحشــة .. الك وحشــة )

الك وحشة ابكُبر همي
ابكثر مايحترگ دمي
الف مره
اعيش اللحظة كل لحظة
واگوم استقبلك رگضة
وارد حسره
ضوه بعدك فلا يضوي
ولا ماي العذب يروي
بلا ثمره
تعال اتموت الفرگه
تحن ادموعي للملگه
على العشره

اذا حنيت .. يميل البيت
علي ونيني
تعال وهاك .. جرح فرگاك
يضي عيني

حرت واهل الصبر حارت
يخيمة بعاصفة وطارت
( الك وحشــة .. الك وحشــة )

يبوية خلص المـدمع
بعد شبچي اذا ترجع
حرت بيها
لخلي دمعي شاهد
اشارة لغيبة الوالد
اخليها
ونين الضامي بالصحره
حنين ايفسر الصخره
وابچيها
ذبحتوني عميتوني
صوركم تارسة اعيوني
احاچيها

احس كل يوم .. سهم مسموم
وسط چبدي
متت ياريت .. ولا ضليت
جرح يدي

مثل قصتنا ماصارت
يخيمة بعاصفة وطارت
( الك وحشــة .. الك وحشــة )

على درب السفر اگعد
واضل من الفجر انشد
إلى المغرب
اساميكم ارتبها
سره ودموعي اكتبها
واضل اكتب
واقبل كل اسم بيكم
احبكم واعتب اعليكم
وارد اعتب
غريبة وحيرة وين امشي
انا طيرة ووگع عشي
وضع يرهب

مشي خطوات .. طحت مرات
جسم ناحل
صحت ونخيت .. يعم ناديت
يبو فاضل

كتايب وحشتك غارت
يخيمة بعاصفة وطارت
( الك وحشــة .. الك وحشــة )

صدگ يابوية من تالي
اسولف وي مهد خالي
والوليله
دلول المشو اهله
يموت ومنهو يندله
اناغيله
دلول الـگلب هايم
يـعبدالله ترد سالم
انا ادعيله
خذو كلشي ومشو كلهم
ولا اندلهم واروحلهم
انا اشكيله

لون ويـاي .. اشربك مـاي
ولا تضمه
يمرني احسـاس .. واحس النـاس
بلا رحمه

عجيبه الدنيــا لو جارت
يخيمة بعاصفة وطارت
( الك وحشــة .. الك وحشــة )

بقيت اترجه واتحلم
لحد ماصاح ابن حذلم
خبر عندي
رحت اركضله بالمدمع
لچن ام الگمر اسرع
مشت تحدي
عرفت القصة بالكامل
بعد لا ابوية لا كافل
واضل وحدي
رغم هذا وخبر اصعب
سبية عمتي زينب
لطم خدي

بلا حراس .. اخت عباس
الف وسفه
سبي وآلام .. يجرح الشام
ولا يشفه

ضعينة ابلا اهل سارت
يخيمة بعاصفة وطارت
( الك وحشــة .. الك وحشــة )

رجعت اسحگ على جروحي
واصيحن موتي ياروحي
مشه الغالي
يدار الما ترد الها
بعد هيهات اطبلها
بلا والي
ولا اهنى ابشراب المي
لا گعدة بعد بالفي تجي ابالي
تحت شمس الظهر لجلك
انام اعله الرمل مثلك
ولا ابالي

يسگف الدار .. عسن تنهار
نعم ارضه
ابويـه نام .. ثلث تيام .. على الرمضه

عليلة بفگدك انهارت
يخيمة بعاصفة وطارت
( الك وحشــة .. الك وحشــة )