جد بالمسير (مكتوبة) - باسم الكربلائي

جد بالمسير الكربلا واسرع يناعي الموت
من توصل الصوب النهر صيح بحزين الصوت
امك خبرها .. يا عباس
شابح نظرها .. يا عباس

گوم اطوي يا ناعي الدرب ليل نهار
والكربلا اتعناها
واتوسط اگبور النشامه الاقمار
وام البنين انعاها
يا من صوركم چانت اتضوي الدار
غدر الزمن طفاها
عطر الوفه الظل عدها منكم تذكار
نشف دموع ابچاها
حسرتها حنان الوالده منها الدليل يذوب
واعليها يلتم الحزن كلما يصير اغروب
عبرة ابصدرها .. يا عباس
شابح نظرها .. يا عباس

گلهم اجيت او جايب اوياي اعتاب
من امكم الربتكم
لا خبر لا مرسول اجه ايدگ الباب
يالطولت سفرتكم
ناعيكم ابيوم الرجع يا غياب
يخبرها عن قصتكم
نشدته اعله حسين ابدمعها السجاب
ما همت ابردكم
ما نشدته اعله الاربعة وظلت تدير العين
كل ظنها جدام الظعن سالم يعود حسين
وعظم اجرها .. يا عباس
شابح نظرها .. يا عباس

وگله يعباس المسهل الكلفات
يا گمر عالي ابفضلك
مثل امك ابدنياي تحصل هيهات
لا وحگ طيبنة اصلك
يا أم مثلها اصبحت باب الحاجات
كل محب إلها يسألك
وشلون گلي انعدها من الاموات
أم اللي ولدت مثلك
قبلة وفه ومرهم شفه وايداوي كل مجروح
نوح الثكول الفاگده ناحت على المذبوح
آية فخرها .. يا عباس
شابح نظرها .. يا عباس

اتگول الوصي اتقدملي وأهلا ناديت
وآنا الچنت مفتخره
لا مو شريكه ابدخلتي الأشرف بيت
خادمه الولد الزهره
وخلف الحسن وحسين ياما صليت
وفقني رب القدره
لكن طلب عندي صعب واتمنيت
موتي الحسين يحضره
هذا الشعور المبدأي مثله محال يصير
عن الوعي والمعرفة اعظم وأجل تفسير
عالي گدرها .. يا عباس
شابح نظرها .. يا عباس

امك الما يوم التهنت بالماي
تذكر گطع چفينك
يا گمر بيتي الطفه ابظلمة دنياي
يوم الطفوا عينك
من ذكرياتك ابنك الظل وياي
سلوتي ابيني وبينك
يالبيك اشم ريحة ابوك الوفاي
نادته اگرب وينك
گربت منية جدتك روح اخبر السجاد
آخر جسد عندك بعد يا دافن الأجساد
ساعة قدرها .. يا عباس
شابح نظرها .. يا عباس

راح الفضل وبجدم يعثر ودموع
تنزل على وجناته
خايف اعله گلب العليل المفجوع
يترادفن دگاته
هذا اللي شاهد راس ابوه المگطوع
ماكو مثل مآساته
وشاهد الخيل الهاشمت منه ضلوع
وشاهد سبي عماته
گله الوفيه الصابره ودتني اوصل ليك
ماتت تگول اتنطرك تحضرني دفني عليك
لمن حضرها .. يا عباس
شابح نظرها .. يا عباس

ساعة دفن أم البنين السجاد
هاجت جميع آلامه
يوم الطفوف اگباله بمصابه انعاد
يرسم صور جدامه
ويا جسد دفنه اصعب من الأجساد
بين اخوته واعمامه
والده الما رحمته اخيول الاحقاد
هشمت كل عظامه
وگباله حاضر بالدفن عمه الكفيل ايشوف
الدفن امه اجه يساعد علي لكن بلايه جفوف
اطلب عذرها .. يا عباس
شابح نظرها .. يا عباس

لنعش الوفه يامن اجيتوا تشيعون
عدكم خبر قصتها
ناعي الذبيح عليها ما خله عيون
منه سبب موتتها
اربع ولد وابغفله عنها ايروحون
ما انصفت دنيتها
رادتهم ابساعة دفنها ايحضرون
وابشيلة اجنازتها
وحسين جدام النعش ويه اخوته موجود
تتمنه شمت ريحته وليها الحياة اتعود
يدخل گبرها .. يا عباس
شابح نظرها .. يا عباس