أصعب صدمة بالكون (مكتوبة) - باسم الكربلائي

 

 

اصعب صدمة بالكون .. بالبر تركض ام عون
والصدمة الجبيرة .. من راحت أسيرة
اصعب صدمه بالكون

زينب يهلها تلاحگوها
مچتوفه للكوفه خذوها
وين الهواشم ما يجوها
عدكم مره وليه ولوها
فوگ الهزل من ركبوها
صوب الغري اتعاين لگوها
لو شافت طفل طاح .. تتلفت للرماح
منظر والله حيره .. من راحت أسيرة
اصعب صدمه بالكون

حادي الظعن ضاعف وجعها
مر بالمچاتيل وفجعها
واستهزأ الحادي بوضعها
اتنختهم ومحد سمعها
شافت حسين وهل دمعها
واتمنت الدوس بضلعها
صاحت يا ابو الراي .. ألتم وامشي وياي
والنظرة الاخيرة .. من راحت أسيرة
اصعب صدمه بالكون

صوب الشريعة الحادي مرها
مدري اشتفرهد من عمرها
من شاهدت جثة گمرها
صاحت هلا بعيني ونظرها
بكل خطوة يتحير أمرها
راح الگبل يمسح اثرها
أول تالي يا ناس .. تمشي ابلايه عباس
صاحت كل غيره .. من راحت أسيرة
اصعب صدمه بالكون

جابوها للكوفه بهزيله
من التعب زينب نحيله
بنسوانها تهم كل قبيله
محد يطالب بالعقيلة
نظرة المتشمت ثگيله
زينب عزيزه مو ذليلة
سوط وناگه وحبال .. من حالٍ الى حال
ما فزعت عشيرة .. من راحت أسيرة
أصعب صدمة بالكون

من دخلت القصر الإمارة
مهيوبة واعلى من المنارة
والوالي من شاف الحياره
ظل يضرب بروس الغياره
بعد الشتم صدر قراره
للشام ينگادن يساره
حتى الما إله راي .. ظل يتمرجل اهواي
الكل ميت ضميره .. من راحت أسيرة
اصعب صدمه بالكون

هضموا علي وهضموا نبيها
وافتروا البلدان بيها
چانت اميره بسد وليها
تتفرج الوادم عليهاد
شما تشگف حجار بإديها
تتمنى بو فاضل يجيها
ناس اتشامر حجار .. ناس امكيفه بالصار
فرت ديره ديره .. من راحت أسيرة
اصعب صدمه بالكون

دخلت الشام بروس أهلها
شمحتاجه ما واحد يگلها
ضحكوا لأن ذابل شكلها
تتمنى كون يحين أجلها
صدت على واحد كتلها
ايهوس اجه براس الكفلها
صبراً آلَ كَرار .. قادم صاحب الثار
يا ثار الأميرة .. من راحت أسيرة
اصعب صدمه بالكون

 

للشاعر : سيد رفعت الصافي