زيارة الغريبة (مكتوبة) - حيدر البياتي

 

 

زيارة الغريبة ، عظيمة المصيبة

رسول الله يگول النه بدموع العين
البچى عليها بچى الحسن وحسين

          عظيمة المصيبة

يـالتــريد تـزور زيـنب اذكــر سـبيـها
واذكر الطف ومصابه و طيحة وليها
اجـت خمس اخوان عدها و مدلليها
تـالـي كلهم ساعة وحده بعدو عليها

بقت ليــل اهدش المـن يگصد نظرها
اعتنت للتـل بمشـيها ومحـني ظهرها
تندب حسين وضلوعه الحافر كسرها
تندب العبـاس طـايح جف من گمرها

اخوها سحكو صدره
واثنعش طبرة بنحره

بقـت تصـرخ يخـوتي اتجـه لاوين
البچى عليها بچى الحسن وحسين

          عظيمة المصيبة

وسـفة بت تـاج العشاير مالها عشيرة
شيخها امطشر وجسمه انلم بحصيرة
بـت عـلـي الله اكــبـر راحـت اسـيـرة
و بالحبل تـنجر اديهـا هضمة الجبيرة

هــاي زيــنــب العـقـيلـة الهـاشـمــية
صــار اسمها خـلاف اهـلها الخارجية
بت امير الكوفة حيدر حامي الحمية
طبت اعلـه الكوفـة تالي وسفة سبية

والبيت ابوها اتعدت
ونـت بحرگـة وحنت

تنادي وينه عني اليوم ابو السبطين
البچى عليهـا بچى الحسن وحسين

          عظيمة المصيبة

يـالتـروح الشــام اذكـر هـمـها وحزنها
شلون من طبتله زينب حايرة بضعنها 
مـن الهـزيلـة جـم يتيمـة يوگـعها ونها
وشوف جم حجارة منهم لجمت متنها

تصـيح مـن النظر كــافـي والله خُزينا
وكــت خـلـه النـاس كـلهـا تنظر مشينا
هـذا يضـحك هـذا سوطه يطبـع علينا
وهذا يرمي حجار واحنه نشكف بدينه

كل جرح تنسه همه
والشـام اسمه لجمة

من أثر حبل السبي تنزف دمه الجفين
البچــى عليـها بچـى الحسن وحسين

          عظيمة المصيبة

لـو وكـفت كبـالها اذكـر غـــربــتها غـربـة
وگفـت بديــوان امــيــة عالحــرة صعبـة
وراس اخوها بطشت يمها تشوفه وتندبه
وابــن هــنــد بخـيزرانــه ثـــغــره يضربه

وبقت مهضومة وتنادي وين اهلي عني
وينـه جعفر وينـه حمـزة وينـه الكفلني
واحــد يريـد السـَكينـة يـاخـذهــا مني
يريدها خدامـة عنـده وهــذا الهضمني

الديــوان يا مصابه
و يا هضمة الخرابة

اخوي الدگلي صدره اليوم اجيبه منين
البچـى عـليـها بچـى الحـسن وحسين

          عظيمة المصيبة

اذكــر هنـاك الخـرابــة وبدمعك ارسم
طفلة تشبگ راس ابوها وبمنحره تشم
تگله بويـه من غيابک كل عمري مظلم
زغيرة واسياط آل اميـة بمتوني تلچم

لـو ردت يا ابـو المحنـة تســأل عـليـه
تغيرت كــلش يغــالي عگبــك رقــيــة
بـويــه متني صــايـر ازرگ مــن الاذية
وياك اخذني الموت ارحم يحسين اليه

يا بويـه اريد بلهفة
اشبک الراس واغفه

بجت يم نحر ابوها و بيها مَر البين
البچى عليـها بچى الحسن وحسين

          عظيمة المصيبة

 

للشاعر : السيد موفق الموسوي