قدر المستطاع مكتوبة
صالح الدرازي
صابره و انشاالله اتعدي اعلى خير
حتى لو رف الحزن من فوقي طير
بويه قَدْرِ المُستطاع
لا تسولف عن وداع
***
١:
خِذني بحضانك عليله
و الحزن من گلبي شيله
تگصر اللحظه في حضنك
لكن بهجرك طويله
شرايده البِنْت امن ابوها
غير يبروزها بدليله
ومن يرد للبيت يضمها
و لا يسولف عن رحيله
وانته طالع گِلّي راجع و الاّ خذني اوياك
بويه تدري أنسى عمري و مستحيل أنساك
في صلاتي و نافلاتي هايمه بذكراك
ياللي عنده چني ورده و هسّه بين أشواك
كل شي گِلّي و روحي عند الله احتِسِبها
بويه بس كلمة وداعاً ما أحِبها
شايفه بعينك هجر و آخر سلام
مدري صح احساسي لو عندك كلام
حتى لو كل حلمي ضاع
لا تسولف عن وداع
***
٢:
جرّبِت كل لحظه صعبه
و اليتِم ماريد أجربه
فقدك انته يغيّر اسمي
ابلا أبو يصير اسمي غُربه
أشتري امن الدنيا كل شي
إلاّ عطف الأب أُو حُبه
و الأرض لو تزرع اقلوب
ما ظن اتنسيني قلبه
لو فقدتك و آني بنتك يالأبو و حنّيت
بكل حنيني وكل ونيني قبرك اتعنيت
جيت أگلّك بويه مثلك والله ما حبّيت
وحشه ظَلمه وماكو نَسمه و لا ضوى بالبيت
سيّر اعلى البيت اذا جى الليل و نِمنه
وانته شوف بعينك الوحشه و يِتِمنه
بويه لا تهگى الألم في صبري ذاب
يعني تگطعني و تريد انسى العذاب
حتى لو بيها انقطاع
لا تسولف عن وداع
***
٣:
الأمل باحلامي ترجع
وادري بيك اتشوف و تسمع
خايفه بنومي اويَ موتك
نلتقي بحلمين و تقطع
غرفتك تشغل حواسي
و بابك امن انظر له يخدع
ينفتح كل ما أردّه
و چنه طيفك منه يطلع
أسقي ذكرى بشوق و عبره وانته تسقي اجروح
ودي وصلك و اقترب لك وانته عني اتروح
منهو يفهم سكتة الهَم و اختناق الروح
و اليتيمه امن الهظيمه صُبح و ليل اتنوح
رحت و جرحي بنزفه صار بقلبي شاعر
والصُور ظلّت على اجدار المشاعر
بويه يا حضرة جمال الله العظيم
يل كفيت بمسحتك قلب اليتيم
والله كافيني التياع
لا تسولف عن وداع
