راسم صورته (مكتوبة) - محمد الجنامي

راسم صورته(مكتوبة)

الرادود: محمد الجنامي

خادم للحسين والحسين رفع شاني
ماعوفه وانساه حسيناه رفع شاني
بالغالي مجنون والجنون على الغالي

واليته .. ناديته .. لآخر لحظه ماعوفه
شايل رايته ويلگاني راسم صورته ابعيني 
واعيوني .. واجفوني .. كل صبح ومسه اتشوفه
غيره غيرته وللموت ابدا مااعوفن احسيني 
انا خطي ومساري .. يبدي من الشعائر
يبقـى ثابت قراري .. مـن ثبات المنابـر
كربلائـي وشـعاري .. ثوره مـن المناحر
بين اربع احروف صحت شوف عشگ روحي
صارن كلمتين ضوه وعين عشگ روحي
وابهاي العيون يشوفون يظل عالي
خادم للحسين والحسين رفع شاني

وديني .. وخليني .. يم اليشفع اذنوبي 
امشي الحضرته واوصل حضرته واكعد اكباله
حد موتي .. وتابوتي .. يبقى حسين محبوبي
ادخل جنته ورغم العواذل اكبر ابجاله
موعد الحب رسمته .. لوحه من الطفوله
من صباي وعشگته .. واسم الحسين اگوله
ابعالم الذر حفظته .. معنى ديني واصوله 
احنه المجانين بالحسين تسمينه 
قائدنه عباس بالاحساس تسمينه
ماظن يگدرون يميزون اله تالي
خادم للحسين والحسين رفع شاني

كل عمري .. من زغري .. خادم وافتخر خادم
احضر مجلسه وادموعي للمظلوم سچابه
وافيته .. حبيته .. وابعشك السبط هايم
حبه مدرسه ورغم اليعاند اقره بكتابه
هذا شوگي وحنيني .. هذا جرحي وطبيبي
ياحسين انت ديني .. وانت امامي وحبيبي
واللطم كل يقيني .. ويبقى نوحي ونحيبي
لو عندي عمرين للحسين اضحيهن
لـرمـاد الخيـام والايتـام اضحيهن
والراسه مصـباح بالرماح شـده بالي 
خادم للحسين والحسين رفع شاني 

هالخدمه .. هالنعمه .. بيها تستلذ روحي
الطم عالصدر واشما نعه الناعي يبچيني
يلگاني .. باحزاني .. حسين العايش ابروحي
منذور العمر لليسري وي دمي ابشرايني 
خدمه حسين امامي .. عندي اعظم وسيله 
ودمعي يصبح وسامي ..  من يواسي العقيله
هذا عهدي ومرامي .. للذنوب الثچيله
هذا اغله محبوبه بالگلوب يظل عايش
واحسيني هيهات فلا مات يظل عايش
وچم زينب اتلوح بالجروح على الوالي 
خـادم للحـسين والحـسين رفـع شانـي 

ماعوفه .. بطفوفه .. لآخر عمري عاهدته
ابقى بخدمته وثوب المجالس والحزن ثوبي
والغالي .. للتالي .. اسمه ابگلبي سجلته
عندي. ازيارته بيها الدموع اتعبد ادروبي
كل خميس امن ازوره .. جية الضامي اجيله
گلبي يملك شعوره .. ويرتوي من سبيله
ومن اوفي ابنذوره .. عندي اعظم فضيله 
والـمايفـهمـون يـكرهـون محـبتنه
وابطـول الايـام والاعوام محبتنه 
راح ابقـى عنـوان للاحـزان ولا بالي 
خادم للحسين والحسين رفع شاني