فارس أوحد (مكتوبة) - باسم الكربلائي
منذ يوم٦مشاهده
فارس أوحد(مكتوبة)
الرادود: باسم الكربلائي
فارس أوحَد .. ما تتردّد
عن ذو الفقارك
احروبك تشهد .. كلما تحتَد
تعلن دمارك
اشغيَّر حالك يوم الباب
مِن احروبك ردنه اجواب
عن ذو الفقارك
صلّى الإله اعليك .. يالمحّد ايضاهيك
ابكل المواقف
بس موقفك بالدار .. زاد التناظُر بيك
اْو حچي المُخالف
يالفزعتك لله .. ما تقبل التشكيك
يوم الكلايف
والهادي ما ناداك .. إلّا اْو صحِت لبيك
ابوجه العواصف
خل الحروب اليوم .. تستذكر ابطاريك
ذيچ المخاوِف
من ينطق الفقّار .. تسكت مَبين ايديك
كل المراهف
منهو اِتقدَّم .. بيها اْو دَمدَم
عنّك نسائل
حطّم أعدَم .. گلَّب بالدَّم
عاليها سافل
يالمِن سيفك تخشى ارگاب
مِن احروبك ردنه اجواب
عن ذو الفقارك
إسمك علي محفور .. ابوقعة بدر مذكور
إنته اْو رهيفك
لسَّاها تحلم بيك .. فارس يهد وايثور
ايراوِدها طيفك
چنت الگطُب يا حيد .. اْو چانت رَحاها اتدور
بس اعله كيفك
يا جاعل الأجساد .. مَرتَع تگصده انسور
واتحيّي ضيفك
صاحت بدر بالويل .. اشلون الزمان ايجور
اْو ماتبدي حيفك
اتعدّه الزمان اعليك .. ماخِذ ثلاث ابدور
اْو ظل يبچي سيفك
هادي العتره .. اْو بنته الزهره
اْو ماخِذ جنينك
السيف ابحسره .. شنهو ايصبره
ناطر يمينك
يامَن حملاتك تنهاب
مِن احروبك ردنه اجواب
عن ذو الفقارك
ابوقعة أُحُد أَبعاد .. بيها إلك ينشاد
كلّك بطوله
هيّه ابلسان الحال .. اتوصفك جبل أمجاد
ابأصدق مَقوله
جُند الرُماة ابحين .. كلمن عن اَمره حاد
ساعة نزوله
صد النبي العيناك .. چنّه يريد اِمداد
لن إنته حُوله
درع اْو صرت تحميه .. عن جَرحه جسمك ذاد
تنزف رجوله
اشصاير يبو الحسنين .. اشلون الجبل ينگاد
كلشي ابذهوله
اجروح اِنهالَت .. بالدّم سالَت
والهادي صِنته
اْو صرخه اِتعالَت .. حربك گالَت
هم هاذي بنته
صدر الزهره اشلون انصاب
مِن احروبك ردنه اجواب
عن ذو الفقارك
الخندق يهالجيدوم .. شافت هذاك اليوم
أشجع مُناصر
من زاغت الأبصار .. اْو بِلغَت قُلوب الگوم
حد الحناجر
هل من مبارز صاح .. عمرو ابن ود وايحوم
وين العساكر
اِلصدرك علي دگيت .. واثلاثه چنت اتگوم
والكل يحاذر
ساعه اْو فصلت الراس .. جبته اْو يِگَطْر ادموم
جبت البشاير
يَمفَرّق الأحزاب .. خد زوجتك ملطوم
شنهو اللي صاير
يامَن قهرك .. صار ابصدرك
يحفر خنادق
گول اشعذرك .. واكشف أمرك
شنهي العوائق
يَمفَرّق ذيچ الأحزاب
مِن احروبك ردنه اجواب
عن ذو الفقارك
ابخيبر إلك تذكار .. هالرايه للكرار
مو للتهيّب
منتظرك الميدان .. اْو دارت عليك اَنظار
والكل ترقّب
الحارث واَخوه اهناك .. الأول بعثته النار
والثاني مرحب
بيدك دحيت الباب .. الفتح اعله إيدك صار
والحگ تغلّب
خيبر حزينه اعليك .. اشلون البطل منهار
عالزهره ينحب
يا داحي ذاك الباب .. اشلون اعله بابك نار
خلّوها تلهب
ليث اْو كشّر .. شطّر طشّر
والكل يهابك
لن چف الشّر .. أومىٰ اْو أشّر
تالي اعله بابك
اشلون الليث اتحيطه اذياب
مِن احروبك ردنه اجواب
عن ذو الفقارك
ليش الصبر واشلون .. اِمساءَل يحير الكون
اْو كل البريّه
سيد الرسل وصّاك .. واتلخّص المضمون
ابهاي القضيّه
عاهدته گبل الموت .. اِلعهدك أبد متخون
رغم الرزيّه
أشهَد عليك اَملاك .. تصبر لَوْ ايكسرون
ضلع الزچيّه
معلوم الِاْستنتاج .. ما چانوا ايهجمون
لو ما الوصيّه
چان اِطلَعَت أرواح .. بس ما تِصر اسنون
زعلك منيّه
حربك عيدك .. واللي ايكيدك
فنّه اْو يهاجم
غيظ ايزيدك .. وانته ابإيدك
تقلع جماجم
اِسألنه اْو بانت هالأسباب
مِن احروبك ردنه اجواب
عن ذو الفقارك
الصاير يبو الحسنين .. ما يحتمل أمرين
تعليله واحد
لو ما نزل جبريل .. اْو أوحىٰ ابكمال الدين
لا ما تكابد
بيعة غديرك هاي .. صارت مثل سچين
ابگلب المُعاند
صار الحقد موروث .. حاقد يزيله البين
وايخِلفه حاقد
ضلع الطهر كسروه .. يالهامتك نصين
للباري ساجد
چبد الحسن سمّوه .. گطعوا وريد احسين
كثره الشواهد
ابدمه اترمّل .. سبط المُرسل
واتعلّه راسه
ايظَل يتحمّل .. وزر المقتل
الأسّس أساسه
وابحرگة ذيچ الأطناب
مِن احروبك ردنه اجواب
عن ذو الفقارك
التعلیقات