سيف الله(مكتوبة)
الرادود:باسم الكربلائي
سيف الله يحكي الليلة ويه السيف
كل واحد على الثاني يبدي حتفه
عن فاطمة يدور الحوار
بين الأمير وذو الفقار
ذو الفقار يصيح ضايج بهمه
بس إمامي الكون يگدر يفهمه
سلّم بإجلال عالذي لزمه
السلام عليك يا أبو الهمة
معاتب ولو عندي چم كلمة
ما خذتني ليش ساعة الهجمة
هاشمية من هجمت عداها على دارك
إنت الفتى وهذا أنا ذو الفقارك
حيف المديح بهالشعار
بين الأمير وذو الفقار
هذا راعي السيف بحسرته يجاوب
رد سلامه عليه والدمع ساكب
يگله تعرف زين ابن أبو طالب
ينسف الأجبال من يهب غاضب
شلون أحارب بيه والله مو كاتب
والنبي بالموت وصى لا تحارب
يگله الوصية من حروب أصعب
شلون أصبر وأدري الوديعة تضرب
جدد ذكر باب وجدار
بين الأمير وذو الفقار
سيف أبو الحملات نادى بالعبرة
بيه كلف يا حيدر تجر هالحسرة
بيه چنت أبطال تردي عالغبرة
بحدي أذكر يوم مرحب چنت أشطره
وأسف عالمقدام تگيّد بصبره
واللي يريتك چان تعدى عالزهراء
يبكي ويگله وأسف من تعزها
قنفذ إجاها وبالغمد كزها
تتناقل أخبار اللي صار
بين الأمير وذو الفقار
صاح أبو الحسنين هاك خذ أكثر
بالغسل حسيت بضلع المتكسر
أنا أبو الحملات الفارس القسور
الضارب بسيفين والبطل حيدر
معطلة الأسماء حقي أتحسر
أصبر يا سيف مثل ما تتصبر
يا ذو الفقار وصارمي وحسامي
ذول اصطباري لآخر الأيامي
ينضح مرار الاصطبار
بين الأمير وذو الفقار
صاح هذا السيف الما عرف غمده
الباري يا بو السيف الأزرق يشدّه
الفتح يا حيدر من گبل مدّه
كسر هالاصنام صارت العقدة
والدفاع هالباب نفسه مترصدة
كسرة الأضلع وحدة ضد وحدة
شن حربك وخلي افضخ الجماجم
حرب الضلع تتسمى بالملاحم
أمر الحرب يصدر قرار
بين الأمير وذو الفقار
إلين جلي السد بالحزن يبدي
يگله لا يا سيف ملتزم عهدي
صارمي هاليوم صارم من بعدي
تنتقل مواريث لقبضة المهدي
مو فقط بجيوش بالرعب يهدي
بالمدينة يصيح ثاري لجدي
يدعي الصمد يوم الفرج عاجله
ينبش قبور السامري وعجله
ما تطفى نار الانتظار
بين الأمير وذو الفقار
هالحوار انصاغ مسجلة حروفه
شيعة الكرار تسمعه ملهوفة
تنتظر هالسيف رايدة تشوفه
من يجي الموعود كلها بصفوفه
ياخذ الثار بدمعها المذروفة
من الحجاز يروح لمسجد الكوفة
لابد يمر يعلن النجف زيارة
يقرا أمين الله ويه ذو الفقاره
يصير اللقاء بهالمزار
بين الأمير وذو الفقار
