زينب لفت يم احسين (مكتوبة) - حمزة الصغیر الکربلائي

الشاعر : المرحوم عبدالحسين الشرع

زينب لفت يم حسين
لچن گابعه بالهم
تگله يا ضوه عيوني
عليمن هالفزع ملتم
******
تعنت ليه للخيمه
وتفسر الصخر ونتها
طبت قعدت اگبالـه
وعالخد تهل دمعتهـــا
تـگله اعليك ضلع امك
المظلومه او مصيبتها
سولف لي يماي العين
لا تخفي علي يحسيـن
عليمن هالفزع صوبين
وأشوف ابكثر عج الخيل
وادي كربلــــه غيم
******
أويلي من سمعها احسين
سالت دمعة اعيونــــــه
يـگلها أخاف أسولف لـﭻ
او وجهﭻ ينخطف لونه
ابچتلى او چتل أهل بيتي
يختي الگوم يردونه
ولا بد ما تشوفينه
فوگ الثره امگطعينه
يزينب لا تنوحينه
عينج عاليتامه النار
لو شبت بالمخيم
******
تگله الكاتبك يحسيــن
من هالناس ﭽـا وينه
يگل لها يماي العين
كلها انگلبت اعلينه
تـگل له حمل اضعونك
او سدر للوطن بينه
يـگل لها ما يخلوني
أسدر بعد بضعوني
نيتهم يـچتلوني
ولابد ما تشوفيني
او شيبي يـگطر امن الدم
******
والأكبر عالأرض مطروح
يختي عيونج اتشوفه
او جاسم عالثرى مرمي
ابدال العرس والحوفه
وأخوج اعلى النهر نايم
ويمه امـگطعه اچفوفه
او يمه رايته او جوده
او عينه ابسهم ممروده
بطل حيلي على ازنوده
لو شفتيهن ابكتره
او جسمه اعلى الثره امخذم
******
يختي او سهم المثلث
ابدلالي تشوفينه
او عبدالله الطفل يختي
ابدم نحره امطوقينه
او لو شفتي الشمر يمي
ابعدي او لا تحاﭽينه
تره هو يـگطع ابنحري
او يتربع على صدري
يزينب عايني او صبري
لمن يحكم الباري
او هوه ابحالنا أرحم