زينب يل تنشدون عليه (مكتوبة) - حمزة الصغیر الکربلائي

الشاعر : المرحوم الشيخ كاظم منظور الكربلائي

 

زينب يالتنشدوني عليها.... زينب بالخرابه منزليها
ياهند اشتنشدين...... وانه الچنت زينب
بالله ياهند ارد انشدچ صدّي ليّه وجاوبيني
ليش غيرني زماني وليش كون تضيّعيني
راح يوم الچنت زينب بيه وإنت التخدميني
******
وراح الدلال البيه عشت ..... وإنصبت بالطف إنصبت
إشچنتي ياهند وشچنت ..... واصبحت ماتعرفيني

هم يخطر إبالچ ياهند چان
زينب تنسبي وتوگف بديوان
آنه واليسر وين... وانه الچنت زينب
******
هند من عالكرسي طاحت وصرخت والگلب يلهب
ليش متغيره رسومچ يالعلي والله يزينب
وين البيوت المزهره راحت والخدر المرتب

الله الله شجرى... بهلچ وحالچ غيره
صاحت وديعة حيدره.... ماعلى المحتوم معتب

دهري هدّم بيوتي عليّه
وتدرين شعفت بالغاضريه
عفت أهلي مطاعين.... وانه الچنت زينب
******
شلون صدّت فزع صدّت هند تصرخ يالعقيله
ليش ما تنشف عيونچ وليش حسراتچ ثجيله
وين ذاك الخدر راح وين ابوفاضل چفيله

صاحت بصوت الفاجعه..... عباس ظل عالمشرعه
ومنه الچفوف مگطعه....وهدّمت لحسين حيله
يوم الچان ابوفاضل وجوده
سالم والعلم ملتزم جوده
من چانت الچفين.....وانه الچنت زينب
******
ياهند گطّعت گلبي غربتي بشفرة الونه
ضمّدي جروح البچبدي ولا تنشديني عن أهلنه
ومادريتي شلون نزله بكربله يوم النزلنه
صعدت صواوين الإبه..... وخدور بيها مرتبه
بسيوف أهلها محجبه..... والفلك گطبه بنزلنه
ويدير الفلك گطب الفراسه
والعباس فاروق الحراسه
وبذيچ الصواوين.... وانه الچنت زينب
******
آخ يابيوت المزهره وآه يابدور المضيه
گبل ماچانت ضحايه جسومهم فوگ الوطيه
مغسله بدم الشهاده مچفنه بثوب الحميه

چانت حياتي مأمنه..... وحرّاس بيتي معينه
وماچنت هيچ مدوهنه..... ودوهنتني الغاضريه

ومن چانت صناديد الرساله
تنهى وتامر بسيف العداله
ومن حي چان الحسين.....وانه الچنت زينب
******
ياهند وانصاب گلبي بطبرة من طبرات الأكبر
آه ياجمرة شبابه بالگلب لسـّـاعه تسعر
گبال عيني ومن اشوفه ضلع من جسمي يتكسر
وهدمت حيلي كربله..... وگيدت عليل بسلسله
وفجر عيوني حرمله.....من وريد الطفل فجر
وبحبال اليسر زرني زماني
وسهم العلگمي صكني وعماني
وطفـّى شمعة العين.... وانه الچنت زينب
******
ياهند شحمل بعيني ويه سيل الدمع ساجم
حمر ويخضّب چفوفي مثل حنة عرس جاسم
زفته وحسرة شبابه جمر بگلوب الفواطم
ياهند يكفيچ اليسر .... وجرعت بالكوفه الصبر
والشام أصعب كل أمر.... أچفي ظالم وأجي الظالم

وظهري بالرماح مكسرينه
ومتني بالسياط موسمينه
وهذا على الدهر دين.....وانه الچنت زينب