يادنيه (مكتوبة) - باسم الكربلائي

القصيدة : يا دنيه ما ظل والي
الشاعر : الأديب جابر الكاظمي

الرادود : الحاج ملا باسم الكربلائی

يا دنيه ماظل والي
يا دنيه حتى أطفالي
يادنيه راحوا تالي
يادنيه هضموا حالي
******
بالكوفة مسلم وحده
مابيها ناصر عنده
عدوانه خانوا عهده
و بصبره باذل جهده
بالغربة حفروا لحده
ما تطفى جمرة فقده
و أطفاله تاهوا بعده
راووها نفس الشده
اولادي و آنة أمهم
أولادي سفكوا دمهم
أولادي محد يمهم
اولادي شغلوا بالي
******
ما ننسى حال العتره
شفناها فوگ الغبره
سيدها گطعوا نحره
الخيالة داسوا صدره
و اعياله جدبت حسره
عالوالي تجري العبره
و أطفاله هالمنذعره
مرعوبة صوب الگبره
طفليني هم وياهم
طفليني ما أنساهم
طفليني وين ألقاهم
طفليني تتراوى لي
******
بدموعي عنهم اسأل
يا ديرة محد يندل
دلالي ظل يتأمل
عالفرگة ما أتحمل
لن ناعي صاح و رتّل
طفلينج بلا معقل
ذبحوها يم الجدول
و الثاني يم الأول
ما انسى و شلون اقدر
ما انسى دوم أتذكر
ما انسى هذا المنظر
ما انسى فگد الغالي
******
أطفالي راحوا مني
و ابگلبي جمرة وني
مهمومة خايب ظني
و همومي ما رحمني
محتارة بالطف لني
لا والي ينشد عني
مخلوقة للهم چني
والوَنة صارت فني
أتمنى يگرب أمري
أتمنى يخلص عمري
أتمنى مسلم يدري
أتمنى يتعنالي
******
مذهوله و أجري المدمع
و اعيوني بالدم تنبع
من مسلم اشأتوقع
يا ريته حي و يرجع
لطفاله يحضر يفزع
و بعزمه عنهم يدفع
لاجنه وسط المضجع
للنخوه ما ظن يسمع
هالصرخه لو يسمعها
هالصرخه جان ادفعها
هالصرخه من أرفعها
هالصرخه من دلالي
******
أطفـاله ما رحموهم
من بعده بيه تبعوهم
بالكوفه من ذبحوهم
عل القبله ما داروهم
عل الجدول و نحروهم
من مايه ما رووهم
بالحفره من نزلوهم
يا وسفه ما غسلوهم
مهمومه غايب نجمي
مهمومه و اشتد همي
مهمومه محد يمي
مهمومه و أرجه التالي
******
لطفالي جبدي اتألم
و اجروحه ما تتبلسم
يا دنيه محد يرحم
و الباري هو اليعلم
هالليله عزمي اتهدم
و ادموعي تتفايض الدم
عالمحنه قلبي اتعلم
و اتحمل اهموم الهم
ما ينشف منبع روحي
ما ينشف دم اجروحي
ما ينشف جدول نوحي
ما ينشف دمعي الهالي