هاي أمي (مكتوبة) - باسم الكربلائي

قصیدة : هاي أمي اللي ربتني

 الشاعر : الأديب الحاج جابر الكاظمي

• الرادود : الحاج ملا باسم الکربلائي

 

هاي امي الربتني *** ولهذا الموقف رادتني
بالمدمع نادتني *** وياك استشهد وصتني
حان الموعد *** خل استشهد

******

هذي مفاوز كربلا *** هاي الحرب ياعمي
وهذي وصيه والدي *** شجعتني نخوه امي
مهموم وادري التضحيه *** تكشف سحابه همي
تتناثر ازهار الفرح *** حين يتناثر جسمي
مو وكت شمعه ولا عرس *** وكت انتصاري وعزمي
وامضت الصارم شمعتي *** والحنه تصبح دمي
من اوكع بالمصرع *** اوفي بكل حقوق المرضع
والام الرضعتني *** ويا استشهد وصتني
حان الموعد *** خل استشهد
******
خيل وزلم من كل كتر *** وسط الحرب مجموعه
وادم اجت للمعركه *** لاتعس هدف مدفوعه
بيض الهنادي ملوحه *** وهاي السمر مشروعه
ياعمي ارخص لي اطب*** وخمد سعير اللوعه
هالساعه مو ساعه شمع*** للعرس طفوا شموعه
وجفن امي عاهد لو متت *** يحبس مسيل دموعه
والواعي بتفكيره *** يتمسك باعراف الغيره
والغيره الدفعتني *** وياك استشهد وصتني
حان الموعد *** خل استشهد
******
يحسين ياعمي واظن *** ترخص لي لو ردت اطلع
هزتني لاجلك غيرتي*** وللذبح نحري تطوع
لهساعه ذاخرني الحسن *** هذي وصيته وتسمع
ناداني لو عمك يظل *** وحده ويشح المفزع
ضحي له يبني برقبتك *** وعن مبداك لاترجع
واعدني يحضر والدي *** لو طحت وسط المصرع
عاهدته وعاهدني *** ابرز وبعينه يشاهدني
وعهوده الشجعتني *** وياك استشهد وصتني
حان الموعد *** خل استشهد
******
يحسين ياعمي وبعد *** شتنطر شنهو التالي
وحدتك بالطف هدمت *** حيلي وتغير حالي
خليني ابرز للوغى *** ويصفر شعاع هلالي
لو مانعتني من الحرب *** تصدع ركن امالي
شلون اصبر وشبلك على *** طايح صريع قبالي
دم ابنك ارخصته شتظن*** دم بن خوك الغالي
خل ابرز لعسكر *** اخذ منهم تار لاكبر
والحاله الهظمتني *** وياك استشهد وصتني
حان الموعد *** خل استشهد
******
جاوبه حسين بدمعته *** غير ياجاسم فكرك
بعدك بزهره دنيتك *** شنهو الشفت من عمرك
بأول شبابك ماردت *** كربلا تغيب بدرك
بيك انظر اوصاف الحسن ***لمن عيوني تنظرك
ارجع ياجاسم للخيم *** وامك اظن تنتظرك
منهو اليصبر الوالده ***لو شاهدت دم نحرك
شلون ارجع لخيامي*** والاكبر طايح جدامي
وامي الي بعقتني *** وياك استشهد وصتني
حان الموعد*** خل استشهد
******
جاوبه جاسم يالقلت *** اقصد ياجاسم لمك
هي ال دعتني لنصرتك *** قالت لي انصر عمك
وقالت ياجاسم لاترد *** خوض المنايه بعزمك
وخليني انضر بالحرب *** يم جسم الاكبر جسمك
وقالت لي روح لقاطمه *** صوغه اخذ من دمك
والزهرا من دار الخلد *** ضلت تردد بسمك
هاي الام تتمنه *** تشوف جفوفي بدم تتحنه
عالمذبح دلتني *** وياك استشهد وصتني
حان الموعد *** خل استشهد
******
حادي المنايه بكربلا ***يردد بموتي ويحدي
يا عمي ماظل كل امل *** بس هالامل ظل عندي
استشهد بسوح الحرب *** وامضي لمحمد جدي
وعالكوثر القى المرتضى *** ويطفي الجمر من جبدي
واعتني لمك فاطمه *** وتجلي الترب عن خدي
واقصد واقبل والدي *** واهتف وفيت بعهدي
الوالد يسألني *** وعنك ينشدني ويسالني
هالرحمه الشملتني *** وياك استشهد وصتني
حان لموعد ** خل استشهد