يبن الكرار (مكتوبة) - باسم الكربلائي

القصيدة : يبن الكرار
الشاعر : الأدیب جابر الكاظمي
الرادود : الحاج ملا باسم الكربلائی 

هذا انته يبن الكرار ... أول بنيني
وحده من الاثنين اختار..مهجتي و عيني
و اقبل هديتي يبني...اقبل هديتي يبني
******
يا أول شبل للأربعة الأشبال
و أبوك الاسد لو زمجر يصب زلزال
ورثت منه الشهامة و غيرة الأبطال
و مثله لمّن تزمجر تهز اجبال
اشتطلب يا عباس انطيك..هاي آنة أمك
بحسين أخوك ارد اوصيك..ضحي له بدمك
و احفظ وصيتي...و احفظ وصيتي يبني
******
يالهفة صدر مابطلت ونته
وصية وياك يامن للعهد صنته
أخوك حسين گلبي و الضلع انته
بيك حسين أحفظه و بيك أمّنته
ياوليدي سجّل بدماك...عهد الوصية
من توفي يصبح فرگاك ...هيِّن علية
تهوِّن رزيتي ... تهوِّن رزيتي يبني
******
من تمشي الضعينة و انته تحديها
تكفِّل بالعقيلة و صير واليها
جفن للعين انته و بيك اغطيها
و صبي عيني زينب و انته تحميها
انته الجفن هية العين ...احرس نظرها
بالمنحر و بالچفين ... احفظ خدرها
و احرس ثنيتي ... احرس ثنيتي يبني
******
إذا شفت العطش جمراته تتلفع
أريدك انته تروي العيلة و الرضّع
اخذ جود السقاية و للنهر اطلع
و إذا متجيب ماي وياك لا ترجع
ماغيرك اليطفي النار ...نار الرزية
طبع الوفى بروحك صار ...اوضح سجية
تعرف سجيتي ...تعرف سجيتي يبني
******
احفظ هالوصايا بينك و بيني
ياعباس بحياة حسين تحييني
إذا عينك عزيزة هاك اخذ عيني
و إذا چفين رايد هاك اخذ چفيني
كل شي الذي تريده يهون
بس توفي وعدك
عمري ويا عمرك مرهون ... هاي آنة بعدك
انطر منيتي ... انطر منيتي يبني
******
مو هين عليَّ امصابك و فقدك
أموت و لا أشوفن ينحفر لحدك
أشكثر غالي و عزيز و مهجتي اتودك
بس احسين أغله و أعز من عندك
أتمنه يلفيني البين ... ساعة غيابك
لاجنه بمصاب احسين ... هين مصابك
يهدم لي بيتي ...و احفظ وصيتي يبني
******
كل الردت أقوله قلته و احجيته
ما ظل حال مخفي اعليك خليته
و الردته يعباس و تمنيته
ظعنكم بالسلامه يعود ياريته
ريت الظعن ليَّ ايعود ...و اترد حرمكم
لو ما تردون اردود ... يوحش هضمكم
توحش مسيتي ... و احفظ وصيتي يبني