يا عباس فقدك (مكتوبة) - باسم الكربلائي

قصيدة : يـعـباس فقدك هضمنه
الشاعر : الادیب جابر الکاظمی

الرادود : الحاج ملا باسم الکربلائی

 

يـعـباس فقدك هضمنه يـعـباس حرقوا خيمنه

******

إجـيـتك و الدمع يهمي ايتخطه اعله الجمر جذمي

اوصـلت للشاطي لن يمي أشـوفـنك جسد مرمي

صـريع امخضب و مدمي صحت من لوعتي و همي

يـعـباس دهرك حرمنه يـعـباس حرقوا خيمنه

******

لـفيت و روحي شجايه جـبـت أحـزاني ويايه

أصـد لـلعلقمي و مايه صـحت من ضيم دنيايه

يـخـويه ابطيحت الرايه لـفـتـنـه الخيل عنايه

يـعـبـاس مـحد رحمنه يـعـباس حرقوا خيمنه

******

جـنـت بـحماك مهيوبه صـرت مهضومه مرعوبه

أصـد لـلجثث مسلوبه ضـحايه ابدمها مخضوبه

و خـيمنه أصبحت منوبه ابـلـهيب النار منشوبه

يـعـبـاس ذبـحوا زلمنه يـعـباس حرقوا خيمنه

******

أصـيح ابحسره و ابلهفه يـبـو فاضل ألف وسفه

يـمـيـنك ينقطع جفه وريـدك  مـا وقف نزفه

يـخـويه و حالتك كلفه كلف  مصرعك شنوصفه

يـعـباس طيحت علمنه يـعـباس حرقوا خيمنه

******

صـعـب فرقاك يالوالي عـفـتـني ابحيرة اعيالي

يـخـويه اشيجمع أطفالي أنـوحـن و الدمع هالي

عـلـيّ الـضيم متوالي و مـرار الـدهـر يبرالي

يـعـباس خصمك ظلمنه يـعـباس حرقوا خيمنه

******

يـخويه من شفت جسمك صـريـع امخضب ابدمك

صـحت ريت أنذبح يمك يـا لـن ما ينحمل همك

وذر عـالـقاع شيلمك عله اجروحي انطبع رسمك

يـعـبـاس هـايج ألمنه يـعـباس حرقوا خيمنه